दादर स्थानकाचं नाव चैत्यभूमी करण्याची कॉंग्रेसची मागणी

सकाळ वृत्तसेवा
मुंबई, ता. ६ : राज्य सरकारने एल्फिन्स्टन रोड स्थानकाचे नाव प्रभादेवी करण्यासाठी केंद्र सरकारकडे पाठपुरावा करून स्थानकाचे नामांतर केले. त्याच धर्तीवर दादर स्थानकाचे नामांतर चैत्यभूमी असे करावे, अशी मागणी काँग्रेसच्या मुंबईच्या अध्यक्ष वर्षा गायकवाड यांनी केली.
दादर स्थानकाचे नाव चैत्यभूमी करण्याची आंबेडकरी अनुयायांची अनेक वर्षांपासून मागणी आहे. भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त गायकवाड यांनीही चैत्यभूमी येथे जाऊन अभिवादन केले. त्या वेळी या दिवसाचे औचित्य साधून त्यांनी दादर स्थानकाला चैत्यभूमी असे नाव द्यावे अशी मागणी केली. ओशिवरा येथे रेल्वे स्थानक बनत असतानाच त्याला राम मंदिर असे नाव दिले आहे, याची आठवणही त्यांनी करून दिली.
डॉ. आंबेडकर यांच्या आयुष्यात दादरला अनन्यसाधारण महत्त्व आहे. दादर येथे राजगृहात ते राहायचे आणि महापरिनिर्वाणानंतर त्यांचे अंतिम विधी येथेच झाले. त्यामुळे आंबेडकरी अनुयायांच्या भावना दादरशी जोडल्या गेल्या आहेत. दरवर्षी लाखोंच्या संख्येने आंबेडकरी अनुयायी महापरिनिर्वाण दिनी चैत्यभूमीवर येतात. त्यामुळे त्यांच्या भावनांचा आदर करत या अधिवेशनातच राज्य सरकारने असा प्रस्ताव मंजूर करावा, असे गायकवाड यांनी स्पष्ट केले.