Vashi : आता वाशी होणार वाहतूक कोंडीमुक्त; महत्वाच्या प्रकल्पाचे काम होणार पूर्ण

वाशी-कोपरखैरणे या मुख्य रस्त्यावर एकही पादचारी पूल नसल्यामुळे येथे मोठ्या प्रमाणात वाहतुकीची कोंडी होत आहे. ही कोंडी टाळण्यासाठी नवी मुंबई महापालिकेच्या वतीने पादचारी पूल बांधण्याचे काम चालू आहे.

वाशी, सेक्टर ९ येथील या पहिल्या पादचारी पुलाच्या कामातील काही तांत्रिक अडचणी दूर झाल्यानंतर हे काम गतीने चालू आहे. येत्या फेब्रुवारी महिन्याच्या अखेरीस हे काम पूर्ण होणार आहे, अशी माहिती शहर अभियंता संजय देसाई यांनी दिली.

सिडकोने नवी मुंबईची निर्मिती करताना वाशी नोडपासून प्रारंभ केला. त्या वेळी पुढील काही वर्षांत वाढती लोकसंख्या, वाहने यांचा सिडकोने बांधलेला अंदाज काही प्रमाणात चुकीचा ठरल्याचे बोलले जात आहे. याचा प्रत्यय सध्या वाशी सेक्टर १ ते सेक्टर २८ पर्यंत गर्दीच्या वेळी सर्वांना येत आहे.

वाशी सेक्टर ९, १०, ११, १४, १५, १६ या विभागात पुष्कळ प्रमाणात झालेले व्यावसायीकरण आणि अल्प उत्पन्न गटातील रहिवाशांनी केलेले बहुमजली बांधकाम, पुनर्विकासामुळे काही घरांची वाढलेली संख्या, विशेषतः सण उत्सव या काळात खरेदीसाठी बाहेर पडणारे नागरिक वाशीतच अधिक प्रमाणात येणे, यामुळे सेक्टर ९ ते १४ हा परिसर बाराही महिने वाहने आणि पादचाऱ्यांमुळे गजबजून गेलेला असतो.

दोन कोटी ४४ लाख रुपये खर्चातून पादचारी पुलाचे बांधकाम होणार आहे. पुलाची लांबी २७ मीटर व रुंदी तीन मीटर इतकी आहे. या ठिकाणी दोन लिफ्टदेखील बसवण्यात येणार आहे. यामुळे ज्येष्ठ नागरिक आणि लहान मुले यांना पूल चढ-उतार करण्यास मदत होणार आहे.
- संजय देसाई, शहर अभियंता