रेल्वे पेपरफुटीप्रकरणी सीबीआयच्या १२ ठिकाणी धाडी

मुंबई, ता. ९ : पश्चिम रेल्वेने कनिष्ठ लिपिक आणि टायपिस्ट पदासाठी परीक्षा घेतली होती; मात्र परीक्षेपूर्वीच पेपर फुटल्याने सर्वत्र गोंधळ उडाला होता. आता पेपरफुटी प्रकरणात सीबीआयने मुंबई, सुरत, अमरेली, नवसारी आणि बक्सर शहरातील जवळपास १२ ठिकाणी छापे टाकत कागदपेत्र ताब्यात घेतली आहेत. रेल्वे भरती केंद्राच्या वतीने घेण्यात आलेल्या सामान्य विभागीय स्पर्धा परीक्षेच्या (जीडीसीई) प्रश्नपत्रिका आणि उत्तरपत्रिका फुटल्याप्रकरणी पश्चिम रेल्वेने काही रेल्वे अधिकारी तसेच मुंबईतील एका खासगी कंपनीच्या अधिकाऱ्यावर गुन्हा नोंदवला होता. याप्रकरणी सीबीआयने काही कागदपत्रे ताब्यात घेण्यासाठी ठिकठिकाणी धाडी टाकल्याची माहिती मिळत आहे. सीबीआयने यापूर्वीच रेल्वेच्या ८ कर्मचाऱ्यांसह खासगी कंपनीत काम करणाऱ्या सहा अशा एकूण १५ जणांविरोधात गुन्हा दाखल केला आहे. याच अनुषंगाने मंगळवारी सीबीआयने मुंबई, सुरत, अमरेली, नवसारी, बक्सर येथे एकूण १२ ठिकाणी छापेमारी केली.