Sakal Impact: नवी मुंबईच्या ठाणानाक्यावरील ‘त्‍या’ वळणावर रेलिंगचे काम सुरू!

Sakal Impact: पनवेल शहराच्या प्रवेशावरील खांदेश्वर रेल्वे पुलाजवळचे वळण दिवसेंदिवस धोकादायक होत आहे. या वळणावर पनवेलमधून बाहेर पडताना वारंवार अपघात घडत आहेत. याकडे रस्ते विकास महामंडळाचे दुर्लक्ष होत असल्‍याने नाराजी व्‍यक्‍त करण्यात येत होती. याप्रकरणी ‘सकाळ’च्या (ता. १७) अंकात ‘ठाणा नाक्‍यावर अपघातांची मालिका’ या मथळ्याखाली बातमी छापून आली होती. याची प्रशासनाने तात्काळ दखल घेतली असून या ठिकाणी नवीन रेलिंग बसवण्याचे काम सुरू करण्यात आले आहे.

पनवेल शहरातून जाणाऱ्या जुन्या मुंबई-पुणे मार्गावर पनवेल शहराच्या प्रवेशद्वारावर असलेल्‍या खांदेश्वर रेल्वे पुलापूर्वी ठाणा नाका परिसरात तीव्र वळण आहे. त्यामुळे या ठिकाणी वाहनचालकांचा वाहनावरील ताबा सुटून वाहन पलटी होण्याचे प्रकार वारंवार होत आहेत. या ठिकाणी रस्ते विकास महामंडळाकडून सुरक्षेसाठी लोखंडी रेलिंग बसवण्यात आलेले आहेत, परंतु आठवड्यातून एकदा या ठिकाणी अवजड वाहने पलटी होत आहेत

त्‍यामुळे येथील रेलिंग तुटलेल्‍या अवस्‍थेत आहेत; मात्र प्रशासनाकडून नवीन रेलिंग लावण्यात येत नसल्‍याने वाहनचालकांकडून नाराजी व्‍यक्‍त करण्यात येत होती. याप्रकरणी ‘सकाळ’च्या (ता. १७) अंकात ‘ठाणा नाक्‍यावर अपघातांची मालिका’ या मथळ्याखाली बातमी प्रसिद्ध करण्यात आली होती. या बातमीची रस्‍ते विकास महामंडळाने दखल घेतली असून संबंधित ठिकाणी नवीन रेलिंग लावण्याचे काम सुरू करण्यात आले आहे. (Sakal Impact)