Mumbai Crime Ram Mandir: "रामभक्त आहोत, दर्शन घडवून आणतो", महिलेला गंडा घालून लाखोंचे दागिने पळवले

Ayodhya Ram Mandir: आम्ही तुम्हाला श्रीरामाचे दर्शन घडवून आणतो, असे सांगत एका ज्येष्ठ महिलेला तिघा भामट्यांनी २ लाख ६६ हजारांचा गंडा घातल्याची घटना उघडकीस आली आहे. याप्रकरणी खडकपाडा पोलिस ठाण्यात गुन्हा दाखल करण्यात आला आहे.

पोलिसांकडून मिळालेल्या माहितीनुसार, खडकपाडा भागातील लोटस डेंटल केअर सेंटरसमोर त्याच भागात राहणाऱ्या ५६ वर्षीय महिलेसोबत ही घटना घडली आहे. सदर महिला बुधवारी दुपारी खडकपाडा भागातून पायी जात होती. या वेळी त्यांना तीन भामट्यांनी अडवले. आम्ही राम भक्त आहोत, आम्ही तुम्हाला प्रभू रामचंद्रांचे दर्शन घडवून आणतो. यासाठी तुम्ही तुमच्या हातातील सोन्याच्या बांगड्या, इतर सोन्याचा ऐवज पिशवीत गुंडाळून ठेवा, असे भामट्यांनी महिलेला सांगितले.

तिघा भामट्यांच्या बोलण्यावर विश्वास ठेवून तक्रारदार महिलेने जवळील २ लाख ६६ हजाराचा सोन्याचा ऐवज पिशवीत गुंडाळला. हा ऐवज कुणी चोरू नये, म्हणून भामट्यांनी स्वतःकडे घेतला. आपणांस रामाचे दर्शन होत आहे, या आनंदात महिला होती. तेवढ्यात तिन्ही भामट्यांनी महिलेला एकाकी सोडून तेथून पळ काढला. आपली फसवणूक झाल्याचे लक्षात आल्यावर फसगत झालेल्या महिलेने खडकपाडा पोलिस ठाण्यात धाव घेऊन तक्रार दाखल केली आहे.