Railway Ram Mandir News: भगव्या रंगाच्या विद्युत रोषणाईने उजळणार सीएसएमटी इमारत सीएसएमटी इमारत!

Railway Ram Mandir News: अयोध्या येथील मंदिरात प्रभू रामाच्या प्रतिष्ठापनेच्या पार्श्वभूमीवर मध्य रेल्वेच्या सीएसएमटीच्या हेरिटेज इमारत भगव्या रंगाच्या विद्युत रोषणाईने उजळणार आहे. याकरिता मध्य रेल्वे तयारीला लागली आहेत.

आधुनिक काळातील स्थापत्यशैलीचा अद्भुत नमुना अशी ओळख असणाऱ्या सीएसएमटीची इमारत ही जगातील सर्वात आश्चर्यकारक स्थानकांपैकी एक स्थानक आहे. दररोज हजारो पर्यटक या इमारतीला भेट देतात. विशेष म्हणजे, प्रजासत्ताक दिन, स्वांतत्र्यदिन किंवा काही विशेष दिवशी सीएसएमटीच्या हेरिटेज इमारतीवर रेल्वेकडून विद्युत रोषणाई केली जाते.

हे रोषणाई बघण्यासाठी पर्यटक संध्याकाळी सीएसएमटीला मोठ्या प्रमाणात भेट देत असतात. त्यामुळे रेल्वेने अयोध्या येथील मंदिरात प्रभू रामाच्या प्रतिष्ठापनेच्या दिवशी २२ जानेवारी २०२४ ला विद्युत रोषणाईने करण्याच्या सूचना आलेल्या आहे.

त्यामुळे मध्य रेल्वेचे विद्युत विभाग कामाला लागला आहे. यासंदर्भात मध्य रेल्वेचे जनसंपर्क विभागाला विचारले असता विभागाकडून सांगण्यात आले की, यासंदर्भात आम्हाला सूचना किंवा आदेश आले नसल्याची माहिती त्यांनी दिली.

अयोध्येत रामलल्लाच्या स्वागताची भव्य तयारी मुंबईसह देशभरात होऊ लागली आहे. मुंबई आणि उपनगरात उत्सवाचे स्वरूप काही दिवसांपासून सुरू झाले आहे. भगवे झेंडे, मफलर, पताके व रोषणाईचे दिवे साहित्याची मागणी वाढली आहे.

याशिवाय अनेक खासगी संस्था किंवा शासकीय इमारतींवर विद्युत रोषणाईची तयारी अंतिम टप्प्यात आली आहे; तर गुरुवारपासून अनेक इमारतींवर विद्युत रोषणाई करून रामलल्लाचे स्वागत करत असल्याचे दिसून आले आहे.