Navi Mumbai: दुचाकीवरील नियंत्रण सुटल्याने डिलीव्हरी बॉयचा मृत्यू

Navi Mumbai: जेवणाचे पार्सल पोहोचवून परतणाऱ्या डिलिव्हरी बॉयचे भरधाव दुचाकीवरील नियंत्रण सुटल्याने झालेल्या अपघातात डिलिव्हरी बॉयचा मृत्यू झाल्याची घटना एपीएमसी मार्केटमध्ये गुरुवारी मध्यरात्री घडली.

या अपघातात मृत झालेल्या तरुणाचे नाव सुबोधकुमार नारायण यादव (वय २५) असे असून तो मूळचा बिहार राज्यातला आहे. सध्या तो एपीएमसी सेक्टर-१९ मधील हॉटेल देवीप्रसाद बारमध्ये जेवणाचे पार्सल डिलिव्हरीचे काम करून त्याच ठिकाणी राहत होता. गुरुवारी मध्यरात्री एक वाजण्याच्या सुमारास सुबोधकुमार हा वाशी परिसरातील जेवणाच्या पार्सलची ऑर्डर देऊन हॉटेलकडे परत निघाला होता. या वेळी दाणा मार्केट गेटसमोर सुबोधकुमार याचे भरधाव वेगात असलेल्या दुचाकीवरील नियंत्रण सुटले.

त्यामुळे तो रस्ता दुभाजकाला घासत जाऊन दुचाकीसह जोरात खाली कोसळला. यात तो गंभीर जखमी झाल्याने पोलिसांनी त्याला वाशीतील महापालिकेच्या रुग्णालयात दाखल केले; मात्र तेथील डॉक्टरांनी त्याला मृत घोषित केले. या अपघातातील मृत सुबोधकुमारने भरधाव दुचाकी चालवल्याने या अपघातात त्याचा मृत्यू झाल्याचे आढळून आल्याने एपीएमसी पोलिसांनी मृत सुबोधकुमारविरोधात गुन्हा दाखल केला आहे.