Thane Crime: डॉक्टरच्या हत्येची सुपारी देणाऱ्या महिलेवर गुन्हा दाखल

Crime : आर्थिक देवाण-घेवाणीच्या व्यवहारात वाद झाल्याने नाशिक येथील डॉक्टरला ठार मारण्यासाठी सुपारी देणाऱ्या महिलेवर कापूरबावडी पोलिसांना शनिवारी गुन्हा दाखल केला. ठाणे गुन्हे शाखा खंडणीविरोधी पथकाचे वरिष्ठ पोलिस निरीक्षक शेखर बागडे यांना मिळालेल्या माहितीनुसार आरोपी महिला नाशिकमधील एका डॉक्टरची हत्येची सुपारी देण्यासाठी किलरच्या शोधात असल्याची माहिती मिळाली.

या वेळी बनावट सुपारी किलर बनवून पोलिसांच्या मदतीसाठी फिर्यादी फिरोज अलाउद्दीन खान (वय ५८) यांना पाठविले. फिर्यादीने आरोपी नेहा जाधव हिला संपर्क केला असता तो तिला ओळखत होता.

त्याने तिला चिंतेत असल्याबाबत विचारणा केल्यानंतर नेहा हिने सुपारी किलरचा शोध घेत असल्याचे सांगितले. तेव्हा फिर्यादीने काम करण्यास होकार दिला. या कामाचे नेहाने फिर्यादीला ३ लाख रुपये देण्याचे कबूल केले.

तसेच हत्येसाठी एक इंजेक्शन आणि इंजेक्शन सिरिंज विकत घेऊन दिली. दरम्यान फिर्यादीने पोलिसांच्या रेकॉर्ड व्हाईसवर सर्व संभाषण रेकॉर्ड करून हत्येचा कट उधळला. याप्रकरणी कापूरबावडी पोलिसांनी नेहाविरोधात गुन्हा दाखल केला असून खंडणीविरोधी पथक आणि कापूरबावडी पोलिस अधिक तपास करीत आहेत.