Navi Mumbai Crime: हद्दपार आरोपी पोलिसांच्या जाळ्यात; गस्ती पथकाने पकडले

Navi Mumbai Crime: नवी मुंबई पोलिसांकडून ऑगस्ट-२०२३ मध्ये ठाणे आणि रायगड जिल्ह्यातून एक वर्षासाठी हद्दपार केलेल्या पुनीत मिश्राला(२५)एपीएमसी पोलिसांच्या गस्ती पथकाने पकडले आहे.

शिक्षेची मुदत संपली नसताना नवी मुंबईत प्रवेश केल्याने ही कारवाई केली गेली.

एपीएमसीतील भाजी मार्केट भागात राहणाऱ्या पुनीत मिश्राविरोधात एपीएमसी पोलिस ठाण्यात विविध प्रकारचे गुन्हे दाखल आहेत. त्यामुळे गुन्हेगारी पार्श्वभूमी पाहता एपीएमसी पोलिसांनी त्याच्या हद्दपारीचा प्रस्ताव तयार केला होता. परिमंडळ-१ च्या पोलिस उपआयुक्तांनी ऑगस्ट- २०२३ मध्ये त्याला ठाणे आणि रायगड जिल्ह्यातून एक वर्षासाठी हद्दपार केले होते.

मात्र, असे असताना आरोपी पुनीत मिश्रा विनापरवानगी एपीएमसी मार्केट परिसरात आला होता. अशातच पोलिसांच्या गुन्हे प्रकटीकरण पथकातील काही कर्मचारी सोमवारी (ता.२२) पहाटे दोनच्या सुमारास एपीएमसीतील भाजी मार्केट गेट नंबर-७ जवळ गस्त घालण्यासाठी गेले असता मिश्राने त्या ठिकाणावरुन पलायन केले होते.