Maghi Ganesh Utsav: गणेश मूर्तींसाठी गुजरातहून मुंबई महानगरपालिकेने मागवली शाडूची माती!

पर्यावरणपूरक गणेशोत्सव करण्यासाठी यंदा शाडूची माती गुजरातहून महापालिकेने मागविली आहे. पर्यावरणास हानिकारक पीओपीच्या गणेशमूर्तींऐवजी शाडूच्या मातीच्या मूर्ती साकारण्यासाठी मुंबई महापालिकेने गणेशमूर्तिकारांना शाडूच्या मातीचा मोफत पुरवठा केला आहे. यात ५०० टन शाडूची माती मूर्तिकारांपर्यंत पोहोचवण्यासाठी मुंबई महापालिकेने २२ लाख २४ हजार १३३ रुपये ५५ पैसे खर्च केले आहेत.

पीओपीच्या गणेशमूर्ती पर्यावरणास हानिकारक असून विसर्जनानंतर त्याचा परिणाम समुद्रातील जीवसृष्टीवर होत आहे. त्यामुळे सर्वोच्च न्यायालयाने ही पीओपीच्या गणेशमूर्तींवर बंदी घालण्याचे आदेश राज्य सरकार व मुंबई महापालिकेला दिले आहेत. सार्वजनिक गणेशोत्सव मंडळ, घरोघरी प्रतिष्ठापना केली जाणारी गणरायाची मूर्ती शाडूची असावी, असे आवाहन मुंबई महापालिकेने गणेश मूर्तिकारांना केले.

यासाठी महापालिकेने मोफत शाडूची माती उपलब्ध केली. तसेच शाडूच्या मातीच्या मूर्ती साकारण्यासाठी जागाही उपलब्ध करून दिली. शाडूची माती उपलब्ध व्हावी, यासाठी पालिकेने निविदाही मागवल्या होत्या. यासाठी मुंबई महापालिकेने २२ लाख २४ हजार १३३ रुपये ५५ पैसे खर्च केले असून याला प्रशासकीय मंजुरी मिळाली आहे.

अखेर गुजरात येथून शाडूची माती उपलब्ध झाली आणि ५०० टन शाडूची माती मुंबईत आणणण्यात आली. त्यानंतर शाडूच्या मातीच्या गणेशमूर्ती साकारणाऱ्या मूर्तिकारांनी मोफत देण्यात आली. पालिकेच्या परिमंडळनिहाय मूर्तिकारांना माती वितरित करण्यात येणार असल्याची माहिती पालिकेने दिली.