Railway News: पश्चिम रेल्वेवर ४३६ ठिकाणी ‘टॉक बॅक’ यंत्रणा !

Railway News: पश्चिम रेल्वेने स्थानकांवरील तिकीट खिडकीवर (बुकिंग काऊंटर) ‘टॉक बॅक’ प्रणाली कार्यान्वित केली आहे. एकूण ६४ स्थानके आणि २९ पीआरएस केंद्रावर ४३६ ‘टॉक बॅक’ यंत्रणा बसवण्यात आल्यामुळे प्रवासी आणि तिकीट बुकिंग क्लर्क यांच्यात संवादातील व्यत्यय दूर होणार आहे. रेल्वे तिकीट खिडकीवर अनेकदा प्रवासी आणि तिकीट बुकिंग क्लर्क यांच्यात वाद होतात. हे टाळण्यासाठी पश्चिम रेल्वेने नवीन यंत्रणा कार्यरत केली आहे.

प्रवाशांच्या सोयीसाठी पश्चिम रेल्वेच्या बुकिंग काऊंटरवर ‘टॉक बॅक’ सिस्टम उपलब्ध करून देण्यात आली आहे. या प्रणालीमुळे तिकीट जारी करणारे बुकिंग क्लार्क आणि प्रवासी यांच्यात चांगला संवाद होईल. तसेच यामुळे नॉन-इश्यू तिकिटांची संख्या आणि तिकीट रद्द करण्याच्या प्रकरणांमध्येही घट होईल, असे पश्चिम रेल्वेचे मुख्य जनसंपर्क अधिकारी सुमित ठाकूर यांनी निवेदनाद्वारे सांगितले आहे.