Navi Mumbai Crime: पनवेलमध्ये व्यावसायिकाला ४४ लाखांचा गंडा

Navi Mumbai Crime: पनवेलच्या पळस्पे येथील स्टील व्यावसायिकाकडे कामाला असलेल्या एका कर्मचाऱ्याने वेगवेगळ्या भागातील ग्राहकांकडून जमा केलेली तब्बल ४४ लाख ५५ हजार रुपयांची रोख रक्कम घेऊन पलायन केल्याची घटना उघड झाली आहे. आकाश श्रोती असे या कर्मचाऱ्याचे नाव आहे. पनवेल शहर पोलिसांनी त्याच्याविरोधात फसवणुकीसह अपहाराचा गुन्हा दाखल करून त्याचा शोध सुरू केला आहे.

पनवेलच्या पळस्पे भागातील स्टीलचे व्यावसायिक विनोद कुमार बन्सल (५८) यांचे विजय स्टील नावाचे गोदाम जुन्या मुंबई पुणे हायवेलगत पळस्पे येथे आहे. बन्सल यांच्याकडे १० कर्मचारी कामाला आहेत. त्यापैकी आकाश श्रोती हा गोदामातील माल लोड व अनलोडचे काम करत होता. तसेच अधूनमधून ग्राहकांकडून पैसे गोळा करण्याचे काम करत होता.

२२ जानेवारीला आकाश श्रोती याला कर्जत, कशेळी, रोहा, मुरबाड, नेरळ व रसायनी या भगातील स्टील खरेदी करणाऱ्या ग्राहकांकडून पैसे जमा करून आणण्यासाठी पाठवण्यात आले होते. त्यानुसार आकाशने विविध भागातील ग्राहकांकडून एकूण ४४ लाख ५५ हजार रुपये जमा केले होते. मात्र, बराच वेळ झाला तरी तो न आल्याने बन्सन यांनी त्याला फोन लावला असता तो बंद होता. त्याचा पनवेल डेरवली येथील घरी शोध घेतला असता तेथेही तो सापडला नाही. अखेर त्यांनी पोलिसांत धाव घेतली.