Sevagram Express: सेवाग्राम एक्स्प्रेस धावणार अजुनच वेगात; गाडीला लावले जाणार 'हे' डब्बे!

Sevagram Express: सीएसएमटी ते नागपूर दरम्यान धावणाऱ्या सेवाग्राम एक्स्प्रेस आता एलएचबी डब्यासह धावणार आहे. मध्य रेल्वेने २५ मे २०२४ पासून सेवाग्राम एक्स्प्रेसच्या पारंपारिक डब्याऐवजी अत्याधुनिक एलएचबी (लिंके होल्फमन बुश) डबे जोडण्याचा निर्णय घेतला आहे. त्यामुळे सेवाग्राम एक्स्प्रेसमधून मुंबई ते नागपूर प्रवास करणाऱ्या प्रवाशांना मोठा दिलासा मिळणार आहे.

सेवाग्राम एक्स्प्रेसला नेहमीच प्रवाशांची पसंती आहे. त्यातच मेल-एक्स्प्रेसचा प्रवास अधिक सुरक्षित आणि आरामदायी होण्यावर रेल्वेने भर दिला आहे. त्यासाठी पारंपारिक कोचऐवजी एलएचबी कोचची जोडण्यात येत आहे. भारतीय रेल्वेने १९९५ साली लांब पल्ल्याच्या रेल्वेसाठी एलएचबी कोच वापरायला सुरूवात केली.

एलएचबी डबे जर्मन कंपनीने तयार केलेले असून त्याचा विस्तार लिंक हॉफमन बश असा आहे. एलएचबी डबे असलेल्या रेल्वेचा अपघात झाल्यानंतर प्रवाशांना गंभीर इजा होत नाही तसेच एलएचबी कोच वजनाने हलके असल्याने गाड्यांचा वेग वाढतो. १२१४० नागपूर-सीएसएमटी सेवाग्राम एक्स्प्रेस २५ मे पासून तर १२१३९ सीएसएमटी-नागपूर सेवाग्राम एक्स्प्रेस २६ मे पासून एकूण २२ एलएचबी कोचसह धावणार आहे. यामध्ये दोन एसी, १२ थर्ड एसी इकॉनॉमी, ४ स्लीपर कोचचा समावेश आहेत.

एलएचबी डब्यात वैशिष्ट्ये
• उत्तम गती
• सुरक्षित
• वर्धित आसन क्षमता
• बायो टॉयलेट्स
• उच्च वेगाची कार्यक्षम ब्रेकिंग
• उत्तम वातानुकूलित
• किफायतशीर आणि कमी देखभाल खर्च