Railway News: ‘वंदे भारत ट्रेन' होणार आणखी फास्ट; प्रशासनाने घेतला महत्वाचा निर्णय!

Railway News: मुंबई ते अहमदाबाद या स्थानकांदरम्यान धावणारी ‘वंदे भारत’ सुपरफास्ट एक्स्प्रेस ताशी १६० किलोमीटर वेगाने धावणार आहे. याकरिता रुळांची क्षमता आणि इतर कामे करण्यात येणार असल्याची माहिती पश्चिम रेल्वेच्या वरिष्ठ अधिकाऱ्यांनी ‘सकाळ’ला दिली. त्यासाठी सुमारे चार हजार कोटी रुपयांचा खर्चही करण्यात येणार आहे.

देशाच्या अमृतमहोत्सवी वर्षानिमित्त केंद्र सरकारकडून विविध शहरांदरम्यान वंदे भारत एक्स्प्रेस सुरू करण्यात आली. या एक्स्प्रेसला नागरिकांचा उत्स्फूर्त प्रतिसाद मिळत असून, तिची लोकप्रियता दिवसेंदिवस वाढत आहे. या ‘वंदे भारत’ची ताशी १६० किलोमीटर वेगाने धावण्याची क्षमता असली तरी त्या क्षमतेचे रेल्वे रूळ नसल्याने अनेक विभागांत ९० ते ११० किमी वेगाने ती चालवावी लागते.

त्यामुळे या एक्स्प्रेसच्या गतीवर प्रवाशांमधून नाराजी व्यक्त होऊ लागली. याची दखल घेत पश्चिम रेल्वेनेगाड्यांच्या वेग वाढविण्यासाठी रेल्वे मार्गांचे अद्ययावतीकरण करण्याबरोबरच सिग्नल यंत्रणाही सक्षम केली आहे.

भारतीय रेल्वेने ‘मिशन रफ्तार’ योजनेंतर्गत ‘वंदे भारत’चा वेग वाढवण्यावर भर दिला आहे. पहिल्या टप्प्यात पश्चिम रेल्वे मार्गावर धावणाऱ्या मुंबई-अहमदाबाद वंदे भारत एक्स्प्रेसचा वेग वाढवण्यात येणार आहे. त्यासाठी रेल्वे रुळांची वेगमर्यादा क्षमता आणि इतर बाबींच्या अद्ययावतीकरणासाठी तब्बल तीन हजार ९५९ कोटी रुपये खर्च केला जाणार आहे.