Navi Mumbai News: काही पैशांसाठी रिक्षाचालकाला मारहाण करून लुबाडले!

Navi Mumbai News: प्रवासी घेण्यासाठी पनवेल रेल्वेस्थानकाजवळ उभ्या असलेल्या एका रिक्षाचालकाला बेदम मारहाण करून त्याच्याजवळ असलेली रोख रक्कम लुटण्यात आली आहे. याप्रकरणी खांदेश्वर पोलिस ठाण्यात गुन्हा दाखल आहे.

नवीन पनवेल येथील सुकापूर भागात राहणारे रिक्षा चालक प्रवीण सावंत (४९) शनिवारी (ता. २७) रात्री ७.३० च्या सुमारास पनवेल रेल्वे स्टेशनच्या पूर्वेला प्रवासी घेण्यासाठी उभे होते. यावेळी अंधारात आलेल्या एका गृहस्थाने त्यांच्याकडे पैशांची मागणी केली. यावर सावंत यांनी पैसे नसल्याचे सांगून त्याला विरोध केला.

मात्र, संबंधित व्यक्तीने सावंत यांना मारहाण करण्यास सुरुवात केली होती. यावेळी सावंत यांनी त्याला विरोध केला. तरी देखील लुटारूने सावंत यांच्या खिशातील १,४०० रुपये असलेले पाकीट जबरदस्तीने काढून घेत पलायन केले. या घटनेनंतर खांदेश्वर पोलिस ठाण्यात गुन्हा दाखल करण्यात आला आहे.