हिललाईन पोलिस ठाण्यात गोळीबार

उल्हासनगर, ता.२ (वार्ताहर) : भाजप आमदार गणपत गायकवाड आणि शिंदे गटाचे शिवसेना शहरप्रमुख महेश गायकवाड यांच्यात अंदाधुंद गोळीबार झाल्याची घटना शुक्रवारी घडली. जमिनीच्या वादातून हा गोळीबार झाल्याची प्राथमिक माहिती मिळत आहे.
प्राप्त माहितीनुसार द्वारली गावातील एका भूखंडावरील वादामुळे महेश गायकवाड आणि त्यांच्या कार्यकर्त्यांनी गणपत गायकवाड यांचे मुलगा वैभव गायकवाड यांना धक्काबुक्की केली होती. याची तक्रार देण्यासाठी आमदार गणपत गायकवाड हे हिललाईन पोलिस ठाण्यात आले होते. त्यावेळी गणपती गायकवाड यांच्या मागे महेश गायकवाड यांची सहकारी पोहचली. हिललाईन पोलिस ठाण्याचे वरिष्ठ पोलिस निरीक्षक अनिल जगताप यांच्या समोर दोन्ही गट बसलेले असताना हा गोळीबार झाल्याची माहिती सूत्रांनी दिली. या गोळीबारात कल्याण शिवसेनेचे शहर प्रमुख महेश गायकवाड यांना तीन गोळ्या लागल्या आहेत, तर बैलगाडा फेम राहुल पाटील यांना एक गोळी लागली आहे. गोळीबारानंतरचा व्हिडिओ समाजमाध्यमावर व्हायरल होत आहे. या दोन्ही जखमींना उल्हासनगरच्या मिरा रुग्णालयात दाखल करण्यात आले आहे. त्यानंतर महेश गायकवाड यांना पुढील उपचारासाठी ठाण्यातील ज्युपिटर हॉस्पिटलमध्ये दाखल करण्यात आले. महेश गायकवाड यांच्या सुरक्षा रक्षकाने दिलेल्या माहितीनुसार भाजप आमदार गणपत गायकवाड यांनी गोळीबार केल्याची माहिती समोर येत आहे. यात गणपत गायकवाड यांना पोलिसांनी बसून ठेवले असल्याचे बोलले जात आहे. या घटनेनंतर भाजप आणि शिंदे गटाचे पदाधिकारी पोलिस ठाण्याच्या आवारात एकवटले असून हिललाईन ठाण्याला पोलिस छावणीचे स्वरूप प्राप्त झाले आहे.