Navi Mumbai: नायजेरीयन व्यक्ती करत होता अमली पदार्थांची विक्री; पोलिसांनी केली अटक

खारघर सेक्टर-२७ मध्ये अमली पदार्थांच्या विक्रीसाठी आलेल्या एका नायजेरियनला अमली पदार्थ विरोधी पथकाने सापळा लावून अटक केली आहे.

याप्रकरणी पोलिसांनी गिडेऑन इझे (२५) या नायजेरियन नागरिकाला अटक केली असून त्याच्याजवळ ५ लाख २० हजारांचे ५२ ग्रॅम वजनाचे एम. डी. सापडले आहे.

खारघर सेक्टर- २७ मधील पेठगाव परिसरात एक नायजेरियन व्यक्ती अमली पदार्थांच्या विक्रीसाठी येणार असल्याची माहिती पथकाला मिळाली होती. या माहितीच्या आधारे पोलिसांच्या पथकाने खारघर सेक्टर -२७ भागात सापळा लावला होता.

रात्री सव्वा नऊच्या सुमारास गिडेऑन इझे हा स्कुटीवरून संशयास्पदरीत्या या भागात आला होता. यावेळी अमली पदार्थ विरोधी पथकाने त्याची धरपकड केली. पोलिसांनी त्याची झडती घेतली असता त्याच्याजवळ ५ लाख २० हजारांची तपकिरी रंगाची पावडर असलेला ५२ ग्रॅम वजनाचा एम.डी. (मेफेड्रॉन) हा अमली पदार्थ आढळून आला आहे.

पोलिसांनी इझेकडे चौकशी केली, पण त्याने उडवा-उडवीची उत्तरे दिल्याने एनडीपीएस कलमाखाली कारवाई केली आहे.