Accident News: खालापुरात भीषण अपघात; एकाचा मृत्यू तर एक जण गंभीर जखमी

khalapur: जुन्या मुंबई-पुणे राष्ट्रीय महामार्गावर अपघाताच्या दोन घटनांत एकाचा मृत्यू; तर एक जण गंभीर जखमी झाला आहे. अपघाताची पहिली घटना नढाळ गावच्या हद्दीत श्रीराम फायनान्स कंपनीच्या समोरील रस्त्यावर घडली.

या वेळी रस्त्याच्या साईड पट्टीवरून चालत जाणारे मारुती महादेव जाधव (वय ७२) यांना भरधाव दुचाकीने पाठीमागून धडक दिली. या अपघातात मारुती यांच्या पायाला व कंबरेला गंभीर दुखापत झाली असून घटनेनंतर दुचाकी चालक फरार झाला.

त्याच्याविरोधात खालापूर पोलिस ठाण्यात गुन्हा दाखल करण्यात आला असून अधिक तपास पोलिस हवालदार जगन्नाथ गभाळे हे करत आहेत. अपघाताची दुसरी घटना शुक्रवारी सकाळी साडेआठ वाजण्याच्या सुमारास हाळ गावाच्या हद्दीत घडली.

अश्पाक तौकिफ खारकर (वय ५०) हे दुचाकीवरून मुंबई-पुणे जुन्या मार्गावरील सागर हॉटेलसमोर दुभाजक ओलांडून जात होते. त्याचदरम्यान भरधाव टेम्पोची त्याच्या दुचाकीला धडक बसली. या अपघातात अश्पाक यांना गंभीर दुखापत झाली.

त्यांचा रूग्णालयात उपचारांदरम्यान मृत्यू झाला. अश्पाक याच्या मृत्युप्रकरणी टेम्पोचालक अर्जुन बाळकू चणे याच्याविरोधात खालापूर पोलिस ठाण्यात गुन्हा दाखल करण्यात आला असून अधिक तपास पोलिस हवालदार नितीन कांबळे हे करीत आहेत.