Accident News: ट्रेलर उलटल्याने झालेल्या अपघातात ११ वर्षीय मुलाचा दुर्दैवी मृत्यू!

Palghar: पालघर-मनोर मार्गावरील वाघोबा घाटातील वळणावर चालकाचे नियंत्रण सुटल्याने ट्रेलरचा शनिवारी अपघात झाला. याच वेळी तिथून जात असलेल्या लहान टेम्पोवर तो कलंडल्याने अकरा वर्षांच्या मुलाचा चिरडून मृत्यू झाला.

वाघोबा घाटातून पालघरच्या दिशेने येत असताना धबधब्याच्या ठिकाणी भरधाव ट्रेलरचालकाला वळणाचा अंदाज आला नाही. त्यामुळे नियंत्रण सुटल्याने ट्रेलर कलंडला. त्याच वेळेस मनोरकडे जाणाऱ्या छोट्या टेम्पोवर हा ट्रेलर कलंडल्याने हार्दिक कोळी (रा. नायगाव) याचा मृत्यू झाला. टेम्पो रस्त्यातच पडल्याने पालघर व मनोर या दोन्ही मार्गावरील वाहतूक विस्कळित झाली होती.

या ठिकाणी वाहनांच्या लांबच लांब रांगा लागल्या होत्या. पालघर वाहतूक पोलिसांना वाहतूक सुरळीत करण्यासाठी पाचारण करण्यात आले. पोलिस व अग्निशमन दल तात्काळ घटनास्थळी दाखल झाले. अपघातग्रस्त वाहनाला हटवण्यासाठी क्रेन मागवण्यात आली. पुढील तपास पोलिस करत आहेत.