Mumbai Mega Block: रेल्वेच्या तिन्ही मार्गांवर रविवारी मेगाब्लॉक; प्रवास करण्याआधी वाचा संपूर्ण माहिती

Mumbai Local News: उपनगरी रेल्वे मार्गावरील रुळांची दुरुस्ती आणि सिग्नल यंत्रणेत काही तांत्रिक कामे करण्यासाठी रविवारी (ता. ३) रेल्वेच्या तिन्ही मार्गांवर मेगाब्लॉक घेण्यात येणार आहे.

मध्य रेल्वेच्या सीएसएमटी ते विद्याविहार अप आणि डाऊन धीम्या मार्गावर, तर हार्बर मार्गावरील मानखुर्द ते नेरूळ अप आणि डाऊन मार्गावर मेगाब्लॉक घेण्यात येणार आहे. पश्चिम रेल्वेवर सांताक्रूझ ते माहीम अप-डाऊन धीम्या मार्गांवर रात्रकालीन मेगाब्लॉक असणार आहे.(mumbai mega Block)

मध्य रेल्वे

कुठे : सीएसएमटी ते विद्याविहार अप आणि डाऊन धीम्या मार्ग
कधी : सकाळी १०.५५ ते दुपारी ३.५५ वाजेपर्यंत

परिणाम
ब्लॉकदरम्यान सीएसएमटी येथून सुटणाऱ्या धीम्या गाड्या सीएसएमटी ते विद्याविहार स्थानकांदरम्यान डाऊन जलद मार्गावर वळवल्या जातील. या गाड्या भायखळा, परळ, दादर, माटुंगा, शीव आणि कुर्ला स्थानकांत थांबतील आणि पुढे विद्याविहार स्थानकापासून डाऊन मार्गावर वळवण्यात येतील. घाटकोपर येथून सुटणाऱ्या अप धीम्या लोकल विद्याविहार ते सीएसएमटीदरम्यान अप जलद मार्गावर वळवण्यात येतील. कुर्ला, शीव, माटुंगा, दादर, परळ आणि भायखळा स्थानकावर त्या थांबतील.(central Line Mumbai Mega Block)

हार्बर रेल्वे

कुठे : मानखुर्द ते नेरूळ अप आणि डाऊन मार्ग
कधी : सकाळी ११.१५ ते दुपारी ४.१५ वाजेपर्यंत

परिणाम
ब्लॉकदरम्यान छत्रपती शिवाजी महाराज टर्मिनस मुंबई येथून पनवेल/बेलापूर/वाशीकडे जाणाऱ्या डाऊन हार्बर मार्गावरील सेवा आणि पनवेल/बेलापूर/वाशी येथून छत्रपती शिवाजी महाराज टर्मिनस मुंबई येथे जाणाऱ्या अप हार्बर मार्गावरील सेवा रद्द राहणार आहेत. हार्बर मार्गावरील प्रवाशांच्या सोयीसाठी ब्लॉक कालावधीत सीएसएमटी ते मानखुर्ददरम्यान विशेष लोकल फेऱ्या चालवण्यात येणार आहेत.

पश्चिम रेल्वे

कुठे : सांताक्रूझ ते माहीम अप आणि डाऊन धीम्या मार्ग
कधी : शनिवार रात्री १२.३० ते रविवारी पहाटे ४.३० वाजेपर्यंत

परिणाम
ब्लॉकदरम्यान अप मार्गावरील काही धीम्या लोकल सेवा अंधेरी ते चर्चगेटदरम्यान जलद मार्गावर चालवण्यात येणार आहेत. त्यामुळे या धीम्या गाड्या अंधेरी-वांद्रे-दादर आणि मुंबई सेंट्रल स्थानकांदरम्यान जलद गाड्यांप्रमाणे धावतील. विशेष म्हणजे रविवारी दिवसा कोणताही मेगाब्लॉक नसेल.(mega block mumbai)