Mumbai News: अपघातात महिलेसह दोघांचा मृत्यू; सांताक्रूझ, गोरेगावमधील वेगवेगळ्या घटना

Mumbai Accident: सांताक्रूझ आणि गोरेगाव येथील दोन वेगवेगळ्या अपघातात एका महिलेसह दोघांचा मृत्यू झाला. मृतांमध्ये नाझ अल्ताफ अगवान आणि गोरख कुशवाह यांचा समावेश आहे. वनराई आणि वाकोला पोलिसांनी दोन स्वतंत्र अपघाताची नोंद करून तपास सुरू केला आहे.

अल्ताफ हनीफ अगवान हा नालासोपारा येथे राहत त्याचा टुर्स ॲण्ड ट्रॅव्हल्सचा व्यवसाय आहे. रविवारी दुपारी एक वाजता तो पत्नी नाझसोबत माहीम दर्गा येथे कारने दर्शनासाठी निघाला होता. दुपारी अडीच वाजता गोरेगाव येथील पश्‍चिम द्रुतगती महामार्गावरील मृणालताई ब्रिजवर एका कारने त्‍यांना धडक दिली.

जखमी अल्ताफ व नाझ यांना तातडीने जोगेश्‍वरीतील ट्रॉमा केअर रुग्णालयात दाखल करण्यात आले. तिथे नाझला डॉक्टरांनी मृत घोषित केले. तर अल्ताफवर उपचार सुरू आहेत. अपघातात त्याच्या पायाला, हाताला आणि छातीला गंभीर दुखापत झाली होती. अपघातानंतर कारचा चालक पळून गेला होता.

दुचाकी दुभाजकाला धडकली

२१ फेब्रुवारीला राजेश रामआशिष गुप्ता हा मित्र गोरख कुशवाह (३८) याच्यासोबत दुचाकीवरून दादरला जात होते. वाकोला ब्रिजवर राजेशचे नियंत्रण सुटले आणि त्याने दुभाजकाला जोरात धडक दिली. वाकोला पोलिसांनी जखमींना जवळच्या रुग्णालयात दाखल केले. गोरखची प्रकृती गंभीर झाल्याने त्याला नंतर शीव रुग्णालयात हलविण्यात आले होते. शनिवारी २ मार्चला त्याचा उपचारादरम्यान मृत्यू झाला.