Mumbai Crime: फसवणुकीच्या १० वर्षे जुन्या प्रकरणातील आरोपी अटकेत

Mumbai Crime: दहा वर्षे जुन्या फसवणुकीच्या प्रकरणात कुविख्यात हिस्ट्रिशीटरला भोईवाडा पोलिसांनी अटक केली आहे. बरकत अली सैफुल्ला बेग असे वॉण्टेड आरोपीचे नाव आहे. (mumbai crime news )

पोलिस आयुक्त विवेक फणसळकर यांनी नुकतेच तपासासाठी प्रलंबित प्रकरणांचा पुन्हा तपास करण्याचे आदेश दिले होते. बेगवर मुंबईतील विविध पोलिस ठाण्यांत अनेक गुन्हे दाखल आहेत. संबंधित गुन्ह्यात आरोपी बेगने ‘सीबीआय’ अधिकारी सांगून अनेक पीडित व्यक्तींकडून पैसे उकळले आणि त्यानंतर तो फरारी झाला होता. (mumbai fraud news)

बेगचा शोध घेण्यासाठी पोलिसांचे विशेष पथक तैनात करण्यात आले. गुप्त माहितीदारांकडून आरोपीच्या ठिकाणाचा माग काढण्यात पोलिसांना यश आले. त्यानंतर भिवंडी येथे सापळा रचून त्याला शुक्रवारी (ता. ८) रात्री अटक करण्यात आली.

पोलिसांनी आरोपीला न्यायालयात हजर केले असता त्याला ९ मार्चपर्यंत पोलिस कोठडी सुनावण्यात आली. आणखी तीन फसवणुकीच्या गुन्ह्यांसाठी पोलिसांना त्याच्या कोठडीची आवश्यकता आहे. तसेच त्याच्यावर भांडुप पोलिस ठाण्यात फसवणुकीचे दोन गुन्हे दाखल आहेत.(maharashtra news)