Crime News: सिडकोच्या घरासाठी वृद्धाची सोळा लाखांना फसवणूक

Mumbai Crime: सिडकोच्या घरासाठी घेतलेल्या सुमारे सोळा लाखांचा अपहार करून फसवणूक झाल्याचा प्रकार गोरेगाव परिसरात उघडकीस आला आहे. याप्रकरणी महेश गोपाळ सुर्वे या एजंटविरुद्ध गोरेगाव पोलिसांनी अपहारासह फसवणुकीचा गुन्हा नोंदवला आहे.

६५ वर्षांचे तक्रारदार हे नवी मुंबईतील जुईनगरचे रहिवासी असून ते नायर रुग्णालयातून निवृत्त झाले आहेत. त्यांना निवृत्तीतून मिळालेल्या पैशांतून घरखरेदी करायची होती. सुर्वे याने त्यांना घर दाखवले. त्यासाठी सुर्वेच्या एस. एंटरप्राईजेस कंपनीच्या बँक खात्यात २७ लाख २५ हजार रुपये हस्तांतर केले होते.

मात्र, घराची कागदपत्रे देण्यास तो टाळाटाळ करत होता आणि पैसेही देत नव्‍हता. दरम्यानच्या काळात त्याने साडेअकरा लाख परत केले, मात्र सोळा लाखांचा दिलेला धनादेशही वटला नाही. त्यामुळे तक्रारदाराने त्याच्याविरोधात गोरेगाव पोलिसांत धाव घेतली होती. त्यांनी दिलेल्या तक्रारीवरून पोलिसांनी महेश सुर्वे याच्याविरुद्ध अपहारासह फसवणुकीचा गुन्हा नोंदवला आहे.