Crime News: घरफोडी करून पळालेल्या वसईतील चोरांना नाशिकमधून अटक

Nalasopara News: वसई पश्चिम आनंद नगर परिसरात दिवसा घरफोडी करून गोरखपूर एक्स्प्रेसने फरारी झालेल्या टोळीला ७२ तासांत नाशिक रोड रेल्वेस्थानकात अटक करण्यात आली आहे.

माणिकपूर आणि नाशिक रोड रेल्वे पोलिसांच्या संयुक्त कारवाईतून टोळीतील तिघांना बेड्या ठोकण्यात यश आले असून सोन्या-चांदीचे दागिने आणि रोख रक्कम असा सात लाख ५२ हजारांचा मुद्देमाल जप्त केला.(railway police News )

वसई पश्चिमेकडील आनंद नगर येथील ‘अंबा भवन’ या इमारतीच्या तिसऱ्या मजल्यावर राहणाऱ्या कल्पना मोरे यांच्या घराचा कडी-कोयंडा तोडून सोन्या-चांदीचे दागिने, रोख रक्कम असा सात लाखांहून अधिकचा मुद्देमाल ७ मार्चला चोरला होता.

याबाबत माणिकपूर पोलिस ठाण्यात गुन्हा दाखल झाल्यानंतर गुन्हे प्रकटीकरण पथकाचे प्रभारी पीएसआय यांच्या नेतृत्वाखाली स्वतंत्र पथक निर्माण केले होते.

या पथकाने घटनास्थळावरील सीसी टीव्ही, तांत्रिक विश्लेषण, गुप्त बातमीदाराकडून मिळालेल्या माहितीच्या आधारे गोरखपूर एक्स्प्रेसने फरारी होणाऱ्या राकेशकुमार ऊर्फ चिक्की राजाराम यादव (वय ३३), मोहम्मद सईद ऊर्फ शानू गरीबउल्ला खान (वय ३७), लालकेशर ऊर्फ बच्चा ददन राय (वय २७) यांना अटक केली. तीनही आरोपी गोरेगाव, मालाड, वसई परिसरातील राहणारे असून वसई न्यायालयाने त्यांना सात दिवसांची पोलिस कोठडी दिली आहे.

आरोपींकडून ४ लाख ६७ हजार रुपये किमतीचे १०१.४१ ग्रॅम सोन्याचे दागिने, दोन लाख ६९ हजार ८०० रुपयांची रोख, दोन मोबाईल फोन, एक अॅक्टिव्हा गाडी असा सात लाख ५२ हजार ३६८ रुपयांचा मुद्देमाल जप्त केला. गोरेगाव पोलिस ठाण्यात अटक केलेल्या दोघांवर सहा गुन्ह्यांची नोंद आहे.

- पौर्णिमा चौगुले-श्रींगी, पोलिस उपायुक्त, परिमंडळ २