Mumbai Local News: मेगाब्लॉकमुळे मुंबईकरांचे मेगाहाल

Mumbai Local News| लग्न सभारंभ आणि होळीच्या खरेदीसाठी घराबाहेर पडलेल्या मुंबईकरांचे मेगाब्लॉकमुळे प्रचंड हाल झाले आहेत. रविवार वेळापत्रकामुळे निम्म्या लोकल फेऱ्या रद्द करण्यात आल्या होत्या. त्यामुळे मध्य आणि हार्बर मार्गावरील प्रवाशांना लोकल गर्दीचा सामना करावा लागला आहे.

उपनगरी रेल्वे मार्गावरील रुळांची दुरुस्ती तसेच सिग्नल यंत्रणेत काही तांत्रिक कामांसाठी मध्य रेल्वेच्या मुख्य मार्गावर माटुंगा ते मुलुंड स्थानकांदरम्यान अप आणि डाउन जलद मार्गावर सकाळी ११ ते दुपारी चार वाजेपर्यंत मेगाब्लॉक घेण्यात आला. त्यामुळे जलद मार्गावरील वाहतूक धीम्या मार्गावरून चालविण्यात येत होती.

परिणामी, या गाड्या आपल्या निर्धारित वेळेपेक्षा २० ते २५ मिनिटे उशिराने धावत होत्या. यामुळे प्रवाशांना गर्दीचा सामना करावा लागला. ठाणे, डोंबिवली, कल्याण, घाटकोपर, कुर्ला, दादर, भायखळा या स्थानकात प्रवाशांची गर्दी उसळली. ब्लॉक कालावधीत कुर्ला ते वाशीदरम्यानची लोकल वाहतूक पूर्णपणे बंद होती. त्यामुळे कुर्ला ते वाशीदरम्यानच्या प्रवाशांना रस्तेमार्गाने प्रवास करावा लागला. रेल्वेने प्रवाशांच्या सोयीसाठी ब्लॉक कालावधीत सीएसएमटी ते कुर्ला आणि वाशी ते पनवेलदरम्यान विशेष लोकल चालविल्या होत्या; परंतु या लोकलची संख्या कमी होती. त्यामुळे हार्बर मार्गावर प्रवाशांची गर्दी होती.