Railway Social Media: सोशल मीडियाच्या वापरात मध्य रेल्वे टॉप; मिळाले तब्बल इतके व्ह्यूज!

मुंबई, ता. ११ : मध्य रेल्वेने सोशल मीडियाच्या वापरात पब्लिक ॲपवर भारतीय रेल्वेतील सर्व विभागांना मागे टाकत अव्‍वल स्थान पटकावले आहे. महिनाभरात सोशल मीडियावरील २९ व्‍हिडीओंना ९१ लाख ३१ हजार ३९३ व्ह्यूव मिळाले आहेत.

भारतीय रेल्वे सोशल मीडियाचा अत्यंत कुशलतेने वापर करत आहे. रेल्वेमंत्र्यांपासून ते उच्च पदस्थ अधिकाऱ्यांपर्यंत सर्व जण सोशल मीडियाच्या माध्यमातून प्रवाशांच्या सतत संपर्कात असतात. कोट्यवधी रेल्वे प्रवाशांशी सतत संपर्क ठेवून त्यांच्या तक्रारी, सूचना ऐकून त्यावर उपाय शोधण्याचा प्रयत्न करतात. त्यामुळे रेल्वे आणि प्रवाशांमध्ये सोशल कनेक्ट तयार होण्यास मदत झाली आहे.

तसेच, भारतीय रेल्वेच्या सर्व विभागांकडून सोशल मीडियावर प्रवाशांना सूचना देणारे व्हिडीओही शेअर केले जातात. पब्लिक नावाच्या ॲपवर हे व्हिडीओ मोठ्या प्रमाणात नागरिकांकडून पाहिले जात असून महिनाभरात मध्य रेल्वेच्या २९ व्हिडीओंना ९१ लाख ३१ हजार ३९३ व्ह्यूव मिळाले आहेत.

या यादीत कोकण रेल्वे, पश्चिम रेल्वे, मेट्रो, रेलटेल आणि इतर एकूण ३४ विभाग आहेत. त्यांचेही पब्लिक ॲपवर व्हिडीओ आणि व्ह्यूवची संख्या देण्यात आली आहे.

एक्स अकाऊंटही सुसाट

मध्य रेल्वेच्या एक्स अकाऊंटवर प्रवाशांच्या तक्रारींचे निराकरणही केले जाते. याबाबत अधिकारीच उत्तर देतात. यामुळे रेल्वेच्या कामात मोठ्या प्रमाणावर पारदर्शकता आली आहे. सध्या मध्य रेल्वेच्या एक्स अकाऊंटवर ५७१ हजार फॉलोअर्स आहेत.