Thane Loksabha: शिंदेंचा गेम हाणारच? निवडणूक लढवण्यास 'हा' नेता उत्सूक; म्हणाले पक्षाने संधी दिली तर..

ठाणे, ता. १२ : लोकसभा मतदारसंघात उमेदवारीवरून महायुतीत खलबते सुरू आहेत. ही जागा कोणाकडे जाणार हे चित्र अद्यापही स्पष्ट झालेले नाही. त्यात शिवसेना शिंदे गट आणि भाजपकडून वारंवार दावे-प्रतिदावे होत असताना पक्षाने संधी दिल्यास निवडणूक लढण्यास तयार असल्याचे भाजपचे आमदार संजय केळकर यांनी सांगितल्याने नव्या चर्चा रंगू लागल्या आहेत.

लोकसभा निवडणुकीच्या पार्श्वभूमीवर महायुतीत जागा वाटपाचा तिढा अद्याप सुटलेला नाही. एकीकडे शिवसेना शिंदे गट, तर दुसरीकडे भाजपकडूनही या जागेवर दावा करण्यात येत आहे. भाजपच्या पक्षश्रेष्ठींकडूनही मतदारसंघातील उमेदवारीवरून भाष्य केले जात आहे. उपमुख्यमंत्री देवेंद्र फडणवीस यांनीदेखील नवीन पक्ष कार्यालयाच्या उद्घाटन सोहळ्यात ठाणे हे भाजपसाठी महत्त्वाचे असल्याचे सूचक विधान केले होता.

त्यापाठोपाठ भाजपचे आमदार संजय केळकर यांनीदेखील पक्षाने तिकीट दिल्यास निवडणूक लढण्यास तयार असल्याचे सांगितले आहे. तसेच ठाणे लोकसभा भाजपचा पारंपरिक मतदारसंघ असून या मतदारसंघात रामभाऊ कापसे हे भाजपचे खासदार होते.

पण ठाणे जिल्हाप्रमुख दिवंगत आनंद दिघे यांनी नगरसेवक अधिक असल्याचे गणित मांडत शिवसेनेकडे हा मतदारसंघ मागितला होता, पण आता परिस्थिती बदलली असून ठाण्यात भाजपचे आमदार आणि नगरसेवकांची संख्या अधिक असल्याने ही जागा भाजपला मिळावी, अशी कार्यकर्त्यांची भावना आहे.