Mumbai Goa Highway: मुंबई-गोवा महामार्गावर एकामागोमाग घसरल्या ६ दुचाकी; वाचा नक्की काय घडलं

Kokan News: मुंबई-गोवा महामार्गावरील साईडपट्टीवर मातीच्या भरावाचे काम सुरू आहे; पण या कामामुळे कोलाडलगतच्या पुगावनजीक एकामागोमाग एक सहा दुचाकी घसरल्याने चालकांमध्ये भीतीचे वातावरण आहे.

मुंबई-गोवा महामार्गाच्या साईडपट्टीवर मातीचा भराव टाकला जात आहे. रात्रीच्यावेळी ही कामे केली जात असल्याने दुचाकीचालकांची चांगलीच तारांबळ उडत आहे. शनिवारी रात्री (ता. १३) खांब ते कोलाडदरम्यान पुगावनजीक मातीच्या दहा गाड्या खाली करण्यात आल्या होत्या.

पण रस्त्यावरील मातीचा ढिगारा तातडीने हटवला गेला नसल्याने सहा दुचाकी एकामागोमाग घसरल्या आहेत. या दुर्घटनेत किरकोळ दुखापत झाली आहे; पण कोणत्याही प्रकारची सूचना किंवा बॅरिकेड्‌स नसल्याने मुंबईकडून कोलाडकडे जाणाऱ्या रस्त्यावर मोठ्या दुर्घटनेची शक्यता वर्तवली जात आहे.

मुंबई-गोवा महामार्गावर पळस्पे ते इंदापूर या टप्प्यातील कामे आजही अपूर्णच आहे. रस्ता काँक्रीटीकरण झाले आहे; पण साईडपट्टी झालेली नाही. त्यामुळे वाहनचालकांची फसगत होत असल्याने अपघात होत आहेत. अनेक ठिकाणी उड्डाणपूल, सेवा रस्त्यांची कामेही अपूर्ण आहेत.\

- दिनकर सानप, सामाजिक कार्यकर्ते, कोलाड