Mumbai Crime: क्षुल्लक कारणावरून वाढदिवशीच मैत्रिणीची हत्‍या,कांदिवलीतील घटना; आरोपीला अटक

अंधेरी, ता. १६ (बातमीदार) : क्षुल्लक कारणावरून झालेल्या वादातून हेमकुमारी मोतीराम भट या तरुणीची तिच्याच मित्राने मारहाण करून हत्या केल्याची घटना कांदिवलीत उघडकीस आली आहे. डंबर बहादूर विश्‍वकर्मा या आरोपी मित्राला समतानगर पोलिसांनी अटक केली असून त्याला बोरिवलीतील स्थानिक न्यायालयाने पोलिस कोठडी सुनावली आहे.

हेमकुमारीचा रविवारी वाढदिवस होता. वाढदिवस साजरा करण्यासाठी ती डंबरच्या घरी आली आणि तिचा हा शेवटचा वाढदिवस ठरला. डंबर आणि हेमकुमारी हे दोघेही नेपाळचे रहिवासी आहेत. डंबर हा सुरक्षारक्षक म्हणून काम करतो. तर हेमकुमारी ही पेशंटची देखभाल करण्याचे काम करत होती.

काही महिन्यांपूर्वीच ती नेपाळहून नोकरीसाठी मुंबईत आली होती. सहा महिन्यांपूर्वी तिची फेसबुकवरून त्याच्याशी ओळख झाली होती. या ओळखीनंतर ते दोघेही चांगले मित्र झाले होते. वाढदिवस साजरा करण्यासाठी ती आली असता आरोपीची आईही तिथे होती.

दोघांनी वाढदिवस साजरा केल्यानंतर मद्यप्राशन केले होते. यावेळी त्यांच्यात क्षुल्लक कारणावरून वाद झाला होता. त्यातून त्याने तिचे डोके भिंतीवर आदळले. त्यात ती बेशुद्ध झाली होती. तिला तातडीने जवळच्या शताब्दी रुग्णालयात दाखल करण्यात आले. तिथे तिला डॉक्टरांनी मृत घोषित केले. ही माहिती मिळताच समतानगर पोलिसांनी घटनास्थळी धाव घेतली होती.