Navi Mumbai Accident News: खारघरमध्ये कारच्या धडकेत पादचाऱ्याचा मृत्यू; जाणून घ्या घटनाक्रम

Navi Mumbai News: खारघर येथून सीबीडी बेलापूरच्या दिशेने जाणाऱ्या भरधाव कारने रस्त्याने पायी चालत जाणाऱ्या व्यक्तीला धडक दिली. या अपघातात पादचाऱ्याचा मृत्यू झाल्याची घटना मंगळवारी रात्री खारघरमधील बेलपाडा मेट्रो स्थानकाजवळ घडली.

खारघर पोलिसांनी या अपघाताप्रकरणी कारचालकाविरोधात गुन्हा दाखल करून त्याला ताब्यात घेतले आहे.

या अपघातात मृत झालेला रिझवान साबीरअली शाह (३०) हा खारघर, सेक्टर-३५ एफमध्ये राहण्यास होता. तसेच तो व त्याचे भाऊ कॅटरर्सचा व्यवसाय करत होते. मंगळवारी दुपारी रिझवान कळंबोली येथील त्याच्या ओळखीतील मौलाना यांच्याकडे गेला होता.

तेथून तो रात्री खारघर येथील घरी परतण्यासाठी बेलपाडा मेट्रो स्थानकासमोरील रस्त्याने पायी चालत जात होता. या वेळी बेलापूरच्या दिशेने जाणाऱ्या भरधाव कारने रिझवानला धडक दिली.

या अपघातात तो गंभीर जखमी झाल्याने त्याला रुग्णालयात दाखल करण्यात आले. मात्र, डॉक्टरांनी त्याला मृत घोषीत केले. या अपघातानंतर खारघर पोलिसांनी रिझवानला धडक देणाऱ्या कारचालक अरुण घाटविसावे याच्याविरोधात गुन्हा दाखल करून त्याला ताब्यात घेतले आहे.