Mumbai News: किशोरी पेडणेकरांना दिलासा; उच्च न्यायालयाने दिला अटकपूर्व जामीन!

Mumbai News: कोविड काळात शवपिशवी (बॅग) खरेदी गैरव्यवहारात भ्रष्टाचाराच्या आरोपावरून गुन्हा दाखल झालेल्या माजी महापौर किशोरी पेडणेकर यांना मुंबई उच्च न्यायालयाने गुरुवारी दिलासा दिला.

कथित घोटाळ्यात अटक करण्याएवढे पुरावे नाहीत, असे स्पष्ट करत न्या. निजामुद्दीन जमादार यांनी पेडणेकर यांना तीस हजारांच्या वैयक्तिक जात मुचलक्यावर अटकपूर्व जामीन अर्ज मंजूर केला आहे.

कोरोना काळात शवपिशवीची जादा दराने खरेदी करत वैयक्तिक आर्थिक लाभ मिळवल्याच्या आरोपाखाली आर्थिक गुन्हे अन्वेषण विभागाने माजी महापौर किशोरी पेडणेकर यांच्यासह काही पालिका अधिकाऱ्यांविरुद्ध आयपीसी कलम ४२० (फसवणूक), १२० (ब) (गुन्हेगारी कट रचने) या अंतर्गत गुन्हा दाखल केला आहे.

या प्रकरणात किशोरी पेडणेकर यांनी अॅड. राहुल आरोटे यांच्यामार्फत उच्च न्यायालयात अटकपूर्व जामीन अर्ज दाखल केला आहे. मात्र, तपास यंत्रणांनी दिलेल्या मुदतीत पुरावे सादर केले नसल्याने न्यायालयाने अटकपूर्व जामीन अर्ज मंजूर केला आहे.