मुंबईकरांनो, मनापासून करा मतदान

सकाळ वृत्तसेवा
मुंबई, ता. २८ : लोकसभेच्या सार्वत्रिक निवडणुकीसाठी मुंबई उपनगर जिल्ह्यातील चार मतदारसंघांसह शहरातील सहा मतदारसंघांत २० मे रोजी मतदान प्रक्रिया पार पडणार आहे. या दिवशी मुंबईकरांना मनापासून मतदान करण्याचे आवाहन प्रसिद्ध गायक शान ऊर्फ शंतनू मुखर्जी यांनी केले.
लोकसभा निवडणुकीच्या पार्श्वभूमीवर मतदारांमध्ये जनजागृतीसाठी मुंबई उपनगर जिल्हाधिकारी कार्यालयातर्फे विविध उपक्रम राबवण्यात येत आहेत. या उपक्रमांचा एक भाग म्हणून मुंबई उत्तर मध्य लोकसभा मतदारसंघांतर्गत येणाऱ्या विधानसभेच्या वांद्रे पश्चिम मतदारसंघांतर्गत मतदार जागरूकता आणि सहभाग (स्वीप) कार्यक्रमांतर्गत रविवारी सकाळी आर. व्ही. टेक्निकल स्कूल, रामकृष्ण मार्ग, खार जिमखाना येथून ‘व्होट टू व्होट रॅली’ काढण्यात आली होती. या रॅलीत गायक शान यांनी उपस्थितांशी संवाद साधला. आपले मतदान हा लोकशाहीचा आत्मा आहे. प्रत्येकाने मतदान करून राष्ट्रीय कर्तव्य पार पाडावे. त्यानंतरच बाहेरगावी जाण्याचे नियोजन करावे, असे आवाहन केले आहे. यावेळी ‘आपलं मत आपला अधिकार’, ‘बुढे हो या जवान - सभी करे मतदान’, ‘माय व्होट - माय फ्यूचर’, ‘आपका व्होट आपकी ताकद - आपका मत आपका अधिकार’ आदी घोषणाही दिल्या. या रॅलीत नॅशनल कॉलेजचे राष्ट्रीय सेवा योजनेचे विद्यार्थी, नागरिक मोठ्या संख्येने सहभागी झाले होते.
----------------------------------------------
हॉटेलमध्ये विशेष सवलत
मतदानाच्या दिवशी सुटी असल्याने फिरण्यासाठी अनेकजण बाहेर पडतात. त्यामुळे मतदानाची टक्केवारी वाढावी, यासाठी हॉटेल आणि रेस्टॉरंट असोसिएशन ऑफ वेस्टर्न इंडियाने मतदानाची शाई दाखवा आणि हॉटेलवर डिस्काउंट मिळवा, अशी घोषणा केली आहे. मतदान करणाऱ्यांना हॉटेलवर पंधरा ते तीस टक्के सवलत मिळणार आहे. संघटनेच्या या निर्णयामुळे मतदारांना रुचकर, चविष्ट जेवणाचा आनंद घेता येणार आहे.
--------------------------------------------------
मतदानाचा टक्का वाढावा, यासाठी आम्ही प्रयत्नशील आहोत. त्याचाच एक भाग म्हणून हॉटेल्समध्ये पंधरा ते तीस टक्के सवलत देण्याचा निर्णय घेतला आहे. यासाठी बोटावर असलेली शाई दाखवणाऱ्या प्रत्येक ग्राहकाला सवलतीचा लाभ घेता येणार आहे.
- प्रदीप शेट्टी, अध्यक्ष, हॉटेल आणि रेस्टॉरंट असोसिएशन ऑफ वेस्टर्न इंडिया