Navi Mumbai News: डंपरच्या धडकेत दुचाकीस्वाराचा मृत्यू, सायन-पनवेल मार्गावर झाला आपघात

नवी मुंबई, ता. २५ (वार्ताहर) : घाटकोपर येथून तळोजा येथे जाणाऱ्या दुचाकीस्वाराला भरधाव डम्परने धडक दिल्याने झालेल्या अपघातात दुचाकीस्वाराचा मृत्यू झाला आहे.

सायन-पनवेल मार्गावर उरण फाटा येथे शुक्रवारी सकाळी झालेल्या अपघातात सीबीडी पोलिसांनी डम्पर चालकाला ताब्यात घेतले आहे. अपघातानंतर पुणे मार्गिकेवर काही काळ वाहतूक कोंडी झाली होती.

घाटकोपर येथील भटवाडी परिसरात राहणारे अभिषेक मांजरेकर (४२) दुचाकीवरून तळोजा येथे कामानिमित्त जात होते. सकाळी १०.३० च्या सुमारास अभिषेक सायन-पनवेल मार्गावरील उरण फाटा ब्रिजच्या उतारावर पुणे मार्गिकेवर पाठीमागून आलेल्या डम्परने त्याला धडक दिली. या अपघातात गंभीर जखमी अभिषेकला तातडीने कामोठे येथील एमजीएम हॉस्पिटलमध्ये दाखल करण्यात आले होते. मात्र, उपचारांदरम्यान त्याचा मृत्यू झाला. या प्रकरणी सीबीडी पोलिसांनी डम्परचालक आरिफ शेख (२८) याला ताब्यात घेतले आहे.