Kalyan Crime: हॉटेल चालकाला मारहाणप्रकरणी तिघांना अटक

Mumbai Crime : पार्सल घेऊन आलेल्या हॉटेल चालकाला सुरक्षा रक्षकांनी बेदम मारहाण केल्याची घटना खोणी पलावा परिसरात शनिवारी (ता. २२) रात्री घडली होती. याप्रकरणी मानपाडा पोलिस ठाण्यात हॉटेल मालकाच्या तक्रारीवरून गुन्हा दाखल केला होता. यात सुरक्षारक्षक दीपक कालण, अविनाश केवणे व जितेंद्र केवणे या तिघांना पोलिसांनी अटक केली आहे.

डोंबिवलीजवळील खोणी पलावा या सोसायटीत शनिवारी रात्री आठच्या सुमारास ही घटना घडली होती. अभिषेक जोशी यांचा या सोसायटीच्या जवळ थालीवाली ढाबा आहे. जेवणाचे पार्सल घेऊन ते पलावा येथे आले होते. या वेळी तेथील सुरक्षारक्षकांनी एन्ट्री करण्यास सांगितले.

अभिषेक यांनी आपल्या कर्मचाऱ्याला एन्ट्री करण्यास सांगितले असता सुरक्षारक्षक व त्यांच्यात वाद झाला. या वेळी सुरक्षा रक्षकांनी अभिषेक यांना शिवीगाळ करत लाथाबुक्क्यांनी मारहाण केली. ही मारहाण मोबाईल कॅमेऱ्यात कैद झाली होती. याप्रकरणी अभिषेक यांच्या तक्रारीवरून मानपाडा पोलिस ठाण्यात गुन्हा दाखल केला होता. पोलिसांनी याचा तपास करत सुरक्षारक्षक दीपक कालण याच्यासह अविनाश केवणे, जितेंद्र केवणे यांना अटक केली आहे.

“पालवा सिटी मॅनेजमेंट असोसिएशन (पीसीएमए) अशा वर्तनाला माफ करत नाही आणि भांडणाच्या घटनेत सामील असलेल्या सुरक्षा कर्मचाऱ्यांचा आम्ही कामा वरुन काढून टाकले आहे. आमचा कार्यसंघ अधिका-यांशी सक्रियपणे सहकार्य करत आहे आणि त्यांच्या तपासासाठी आवश्यक ते सर्व सहकार्य करत राहील.असे पलावा सिटी मॅनेजमेंट असोसिएशने कळवले आहे.