Harshal Bhadane: पत्रकार हर्षल भदाणे यांचे अपघाती निधन,मुख्यमंत्र्यांचे पोलिसांना तत्काळ कारवाई करण्याचे आदेश

नवी मुंबई, ता. २९ : धुळे येथे झालेल्या भीषण अपघातात नवी मुंबईतील पत्रकार हर्षल भदाणे-पाटील यांचे सोमवारी अपघाती निधन झाले, तर दोन जण गंभीर जखमी झाले आहेत. या प्रकरणी मुख्यमंत्री एकनाथ शिंदे यांनी धुळ्याच्या पोलिस अधीक्षकांना तत्काळ कारवाई करण्याचे आदेश दिले आहे. पोलिसांनी आतापर्यंत दोन जणांना अटक केल्याचे समजते.

धुळे-संभाजीनगर महामार्गावर गरताड गावाजवळ एका भरधाव ट्रकने हर्षल यांच्या चारचाकी वाहनाला जोरदार धडक दिली. भरधाव ट्रक कारला धडक देऊन धुळे शहरात घुसला. मालेगाव रोडवर शिवाजी महाराज चौकात ट्रक चालकाने आणखी चार दुचाकी चिरडून ट्रक सोडून पळ काढला. यावेळी संतापलेल्या जमावाने ट्रकची तोडफोड केली. या अपघातात हर्षल यांचा मृत्यू झाला.

हर्षल यांच्या पार्थिवावर उद्या त्यांच्या गावी अंत्यसंस्कार होणार आहेत. हर्षल यांच्या पश्चात आई, वडील आणि पत्नी असा परिवार आहे. हर्षल यांच्या अपघाताची बातमी समजताच मुख्यमंत्री एकनाथ शिंदे आणि उपमुखमंत्री देवेंद्र फडणवीस यांनी तत्काळ कारवाईचे आदेश दिले आहेत.