Virar News: आशा सेविकांकडून माहिती मिळवली, महिला रुग्णांना गंडवले; बनावट डॉक्टरचा कारनामा

Bolinj Vasai Crime News

बोळिंज : डॉक्टर असल्याचे भासवत दोघांनी वसईतील काही महिलांना औषधांच्या नावाखाली गंडा घातला. विशेष म्हणजे आशा सेविकांकडून त्यांनी ही माहिती मिळवली होती. याप्रकरणी मांडवी पोलिस ठाण्यात गुन्हा दाखल करण्यात आला आहे.

वसई तालुक्यात जिल्हा परिषदेची प्राथमिक आरोग्य केंद्राच्या अंतर्गत आशा सेविका काम करतात. त्या घरोघरी जाऊन सरकारच्या आरोग्य मोहिमा राबवतात. २२ ते २४ ऑगस्टदरम्यान दोघांनी पारोळ, भाताणे आणि शिवणसई आरोग्य केंद्रातील आशा सेविका महिलांची भेट घेतली. पालघर जिल्हा परिषदेतील डॉक्टर असल्याचे त्यांनी सांगितले. सरकारकडून वंध्यत्वावर उपचारासाठी औषधे आणल्याचे सांगून आजार असलेल्या महिलांची माहिती मागितली. या आशा सेविकांनी काही महिलांची माहिती दिली. त्यांनी बाधित महिलांची भेट घेऊन त्यांना पुडी, चूर्ण यांच्या पुड्या १८ हजार रुपयांना विकल्याचे समोर आले.