Kharghar Crime: खारघरमध्ये अल्पवयीन मुलीला फसवून केला लैंगिक अत्याचार, व्हॉट्सॲपवरून भररस्त्यात..

नवी मुंबई, ता. ३० (वार्ताहर) : खारघर भागात राहणाऱ्या एका तरुणाने त्याच भागात राहणाऱ्या अल्पवयीन मुलीसोबत मैत्री करून जबरदस्तीने तिच्यावर लैंगिक अत्याचार केल्याची घटना उघडकीस आली आहे. पीडित मुलीने त्याच्यासोबत शरीरसंबंध ठेवण्यास नकार दिल्यानंतर या तरुणाने तिला मारहाण करत व्हॉट्सॲपवरून तिला मेसेज पाठवत धमकी दिली. अक्षत सोनावणे (वय २०) असे या आरोपी तरुणाचे नाव असून खारघर पोलिसांनी त्याच्याविरोधात गुन्हा दाखल करून त्याला अटक केली आहे.

अक्षत सोनावणे व पीडित तरुणी हे दोघेही खारघरमध्ये राहण्यास आहेत. २०२० मध्ये पीडित मुलगी अल्पवयीन असताना आरोपी अक्षत याने तिच्यासोबत मैत्री केली. त्यानंतर त्याने तिच्याकडे वारंवार शारीरिक संबंध ठेवण्याची मागणी केली. पीडित मुलीने त्याला नकार दिल्यानंतरदेखील आरोपीने तिच्यावर दोन वेळा जबरदस्तीने लैंगिक अत्याचार केले.

मात्र त्यानंतरदेखील पीडित मुलीने त्याच्यासोबत कायम शरीरसंबंध ठेवावेत, यासाठी आरोपी पीडितेच्या पाठी लागला होता, मात्र पीडितेने त्याला नकार दिल्याने आरोपीने तिला मारहाण केली, तसेच तिला व्हॉट्सॲपवरून मेसेज पाठवून भररस्त्यात अत्याचार करण्याची धमकी दिली. आरोपीकडून वारंवार होणाऱ्या त्रासाला कंटाळून अखेर पीडितेने खारघर पोलिस ठाणे गाठून तक्रार दाखल केली. त्यानुसार पोलिसांनी अक्षतविरोधात गुन्हा दाखल करून त्याला अटक केली आहे.