Thane Crime: तोतया समाजसेवकाला अटक ! मिठाई विक्रेत्याकडे मागत होता खंडणी

ठाणे शहर, ता. ९ (बातमीदार)ः कोपरी येथे मिठाई विक्रेत्याकडे ५० हजारांची खंडणी मागणाऱ्या एका तोतया समाजसेवकाला पोलिसांनी अटक केली आहे. कोपरी परिसरातील व्यापाऱ्यांना धमकावून त्यांच्याकडून खंडणी उकळत होता.

कोपरीत मिठाई विक्रीचा व्यवसाय करणाऱ्या व्यापाऱ्याकडे ५० हजारांची खंडणी मागण्यात आली होती. याबाबतची तक्रार आल्यानंतर कोपरी पोलिसांनी सापळा लावत खंडणीची रक्कम स्वीकारताना रविवारी (ता. ८) कडुबा तेलुरेला (६०) रंगेहाथ अटक केली. त्यानंतर कोपरीतील शासकीय निवासस्थान, बारा बंगला परिसरातून पोलिसांनी भोसले नामक एका ४० वर्षीय तोतया समाजसेवकाला अटक केली आहे. त्याच्याकडून जवळपास एक लाख ८० हजारांची रक्कम जप्त करण्यात आली आहे. या दोन्ही आरोपींना न्यायालयाने सात दिवसांची पोलिस कोठडी सुनावली आहे.