मतदान केंद्रावर नवमतदारांचा उत्साह

मतदान केंद्रावर नवमतदारांचा उत्साह
वसई, ता. २० (बातमीदार) : सहा विधानसभेत झालेल्या मतदानाच्या दिवशी युवकांमध्ये उत्साहाचे वातावरण दिसून आले. मतदान कसे असते, उमेदवार निवडून आणण्याचा हक्क कसा असतो, याचा अनुभव पहिल्यांदाच लोकशाही उत्सवात सहभाग घेताना मतदान केंद्रावर दिसून आले.

मतदान केल्यानंतर केंद्राबाहेर आल्यावर आनंद निर्माण झाल्याचे तरुणांमध्ये पाहवयास मिळाले. सेल्फी, छायाचित्र काढून आम्ही लोकशाही उत्सवात सहभागी झालो, अशा भावना अनेकांनी व्यक्त केल्या. युवक, युवतींनी समाजमाध्यमांवर आपले छायाचित्र टाकले. देश, राज्य आणि आपला मतदारसंघ विकासाच्या दृष्टीने तरुणाईने मतदान केले.
---------------------
मतदानाचा हा पहिलाच अनुभव होता. सोपारा केंद्रावर जाऊन मतदान केले. खूप छान वाटले. निवडणुकीत आपल्या परिसराचा विकास करेल, अशा उमेदवाराला निवडून देण्यासाठी आई-वडिलांसोबत मतदान केले. पुढच्या निवडणुकीतही मतदानाचा हक्क बजावणार.
- राशी नीलेश वाळींजकार, युवती, नवमतदार
-------------------
मतदानाबाबत कुतूहल होते. पहिल्यांदा मतदान केले. विकासाच्या दृष्टीने आपले मतदान हेदेखील बहुमूल्य आहे. येणाऱ्या सरकारने तरुणांसाठी नोकरी, व्यवसायासाठी प्रयत्न केले पाहिजेत. ज्या सरकारी शाळा अद्ययावत कराव्यात, आर्थिक दुर्बल घटकाला लाभ घेता येईल असे रुग्णालय उभारावे, अशी माफक अपेक्षा आहे. मतदान करून केंद्राबाहेर आल्यावर खूप आनंद झाला.
- तौफिक शेख, युवक नवमतदार
-------------
घरातील सदस्य, नातेवाईक हे प्रत्येक निवडणुकीत मतदान करतात. मलाही हा अनुभव घ्यायचा होता. माझे मतदान ओळखपत्रात नाव आल्यावर आनंद झाला. केंद्रावर जाऊन मतदानाचा हक्क बजावला याचा आनंद होत आहे.
- कार्तिक परदेशी, युवक नवमतदार
------------
लोकसभा, महापालिका व अन्य निवडणुकांमध्ये मतदान करण्यासाठी लोक केंद्रांवर जात असायचे. मलाही मतदान करायचे होते. १८ वर्षे पूर्ण होताच मतदान ओळखपत्र तयार केले आणि पहिलेच मत हे विधानसभा निवडणुकीसाठी दिले आहे. मतदान केल्याचा आनंद झाला.
- विघ्नेश गणेश पै, युवक नवमतदार
--------------
आपल्या मतदारसंघातील उमेदवार हा विधानसभेत जावा आणि विकासाच्या योजना आणाव्यात, यासाठी आपले मतदान हे खूप महत्त्वाचे असते, याची जाण आहे. विधानसभेसाठी पहिल्यांदा मतदान केले. त्यामुळे आनंद झाला. खरेतर प्रत्येक मतदारांनी लोकशाही उत्सवात सहभागी झाले पाहिजे.
- राज सुरेंद्र राऊत, युवक नवमतदार
----------------