निवडणुकीच्या कामाला जाताना रेल्वे अपघातात आशा सेविकेचा मृत्यू

निवडणुकीच्या कामाला जाताना रेल्वे अपघातात आशा सेविकेचा मृत्यू
नालासोपारा, ता. २० (बातमीदार): विधानसभा निवडणुकीच्या कर्तव्यावर जाताना एका आशा सेविकेचा रेल्वे अपघातात दुदैवी मृत्यू झाल्याची घटना घडली. वसई तालुक्यातील कामन परिसरातील नागले या परिसरात बुधवारी (ता. २०) सकाळी ही घटना घडली आहे. सुमन संतोष यादव (वय ३९) असे या आशा सेविकेचे नाव आहे. त्या वसई-विरार शहर महापालिकेच्या आरोग्य विभागात आशा सेविका म्हणून गेल्या पाच वर्षांपासून कार्यरत होत्या. सुमन यादव यांची ड्युटी बुधवारी वसई तालुक्यातील नागले गावातील, जिल्हा परिषद शाळा येथे होती. सकाळी साडेसहा वाजण्याच्या सुमारास त्या वसई-दिवा रेल्वे स्थानकालगतच्या नागले गावात जात असताना रेल्वे रूळ ओलांडत होत्या. या वेळी रेल्वे रूळ ओलांडताना रेल्वेच्या धडकेत त्यांचा दुदैवी मृत्यू झाला. सुमन यादव यांच्या मृत्यूने पालिकेच्या कर्मचाऱ्यांमध्ये हळहळ व्यक्त करण्यात येत आहे.