मुंबईत दोन दिवस लसीकरण राहणार बंद

मुंबई - कोविड-19 (Covid-19) प्रतिबंध लसीकरण (Vaccination) मोहिमेतंर्गत पुरेसा लससाठा (Vaccine) उपलब्ध नसल्यामुळे मुंबई महानगरपालिका (Mumbai Municipal) क्षेत्रातील शासकीय आणि महानगरपालिका लसीकरण केंद्रांवर उद्या गुरुवारी 19 आणि शुक्रवारी 20 ऑगस्ट या दिवशी लसीकरण बंद राहणार आहे.

दरम्यान, बुधवारी ही बर्‍याच लसीकरण केंद्रांवर लसीकरण बंद ठेवण्यात आले होते. लसीची उपलब्धता नसल्याने मुंबईतील सर्व शासकीय आणि महानगरपालिका लसीकरण केंद्रांवर लसीकरण होणार नाही.

कोरोनापासून बचाव करण्यासाठी लस घेणे आवश्यक आहे पण, आतापर्यंत अनेकदा मुंबईतील लसीकरण बंद ठेवण्यात आले आहे. त्यातुन मुंबईकरांची गैरसोय होते. आजही बर्‍याच ठिकाणी लसीकरण बंद असल्याने लोकांनी रांग लावूनही डोस मिळत नाही. त्यामुळे नागरिकांमध्येही संतापाचे वातावरण आहे. दरम्यान, पालिकेला अद्याप तरी लसीचा साठा उपलब्ध झालेला नाही. त्यामुळे लसीकरण बंद ठेवण्याचा निर्णय घेण्यात आला आहे.

लशींचा साठा ज्या प्रमाणात प्राप्त होईल, त्या अनुरूप योग्य निर्णय घेवून मुंबईकर नागरिकांना सातत्याने अवगत करण्यात येते. लस साठा उपलब्ध झाल्यानंतर लसीकरण पुन्हा सुरू करण्यात येईल असे पालिका प्रशासनाकडून सांगण्यात आले आहे.