वसईतील कुटुंबावर काळाचा घाला; दरड कोसळून एकाच कुटूंबातील दोघांचा मृत्यू

वसई - वसईच्या भोयदापाडा राजवली याठिकाणी (ता. 13) सकाळच्या सुमारास अचानक डोंगराचा काही भाग घरावर कोसळल्याने 4 जण ढिगाऱ्याखाली अडकले होते. त्यातील दोघांना सुखरूप बाहेर काढण्यात यश आले. तर दोघांचा मृत्यू झाल्याची दुर्दैवी घटना घडली आहे. जखमींना वसईच्या एका खाजगी रुग्णालयात दाखल करण्यात आले आहे. कुटूंबावर दुःखाचे डोंगर कोसळल्याने हळहळ व्यक्त केली जात आहे.

वसई पूर्वेकडील राजावली वाघरळपाडा येथे अचानक दरड घरावर कोसळली यात वंदना अमित ठाकूर (33), ओम ठाकूर (10). अमित ठाकूर (35), रोशनी ठाकूर (14). हे चौघे बुधवारी सकाळी डोंगावरून भुत्खलन होऊन दगड मातीने घर दबले गेले यात राहणारे कुटूंबातील सदस्य ढिगाऱ्याखाली सापडले होते. अग्निशमन दलाच्या जवानांनी पारयचा वापर करत दगड , माती बाजूला करून वंदना व दहा वर्षीय ओम या दोघांना सुखरूप सुखरूप बाहेर काढले. जखमी झाल्याने त्यांना उपचारासाठी रुग्णालयात हलविण्यात आले. तर एनडीआरएफचे पथक, श्वान पथक अग्निशमन दलाच्या मदतीला आले व त्यांनी अमित व चौदा वर्षीय रोशनी यांचा शोध सुरूच असतांना त्यांना देखील बाहेर काढण्यात आले असले तरी मात्र त्यांचा दुर्दैवी मृत्यू झाला आहे.

पुन्हा अनधिकृत बांधकामाचा प्रश्न ऐरणीवर

वसईच्या राजावली भागात भुत्खलन झाले त्या ठिकाणी अनधिकृत बांधकामांचा सुळसुळाट आहे अनेक चाळी उभ्या राहिल्या आहेत, वसई विरार शहरात अशाच प्रकारे अनधिकृत चाळी , इमारतींचे पेव फुटले आहे परंतु स्थानिक प्रशासनाकडून कारवाई केली जात नाही. पावसाळ्यात अचानक दरड कोसळून झालेल्या घटनेनंतर पुन्हा एकदा अनधिकृत बांधकामाचा प्रश्न ऐरणीवर आला आहे.