Uddhav Thackeray: "मीच सर्वकाही केलं अशी फुशारकी मारु नका"; उद्धव ठाकरेंचा फडणवीसांना टोला

Uddhav Thackeray: ठाकरे गटाचे प्रमुख उद्धव ठाकरे यांच्या उपस्थिती आज अजित पवार यांचे समर्थर संजोग वाघेरे यांनी हातात शिवबंधन बांधलं. यानंतर उद्धव ठाकरे यांनी पत्रकार परिषद घेतली. यावेळी राम मंदिराच्या श्रेयवादावरुन त्यांनी भाजपवर टीका केली.

उद्धव ठाकरे म्हणाले, मला निमंत्रण आलं नाही. पण अयोध्येत राम मंदिर होणं ही आनंदाची गोष्ट आहे. शिवसेनेने यासाठी मोठा लढा उभारला होता. स्वत: शिवसेना प्रमुखांचा मतादानाचा अधिकार राम मंदिर आणि हिंदुत्वाचा प्रचार केला म्हणून काढण्यात आला होता. अनेक कारसेवकांनी रक्त सांडल होतं.

युतीचं सरकार आल्यानंतर अयोध्येत खास कायदा करुन मंदिर होईल असं वाटलं होतं. मात्र सर्वोच्च न्यायालयाच्या निर्णयानंतर मंदिर झालं. मी शिवसेनेकडून मोठं योगदान दिलं आहे. मात्र राम मंदिर उद्घाटनाचा राजकीय इव्हेंट होऊ नये, असे उद्धव ठाकरे म्हणाले.

बाबरी पडली तेव्हा फक्त आम्ही होतं. शिवसैनिक कोणीही नव्हते. असतील तर उद्धव ठाकरेंनी स्पष्ट करावे, या देवेंद्र फडणवीस यांच्या वक्तव्यावर उद्धव ठाकरे म्हणाले, त्यांच्या वजनाने बाबरी पडली असेल तर मला माहित नाही. पण त्यावेळी सुंदर सिंग भंडारी, लालकृष्ण आडवाणी यांचे वक्तव्य आहेत. ते फडणवीसांनी पाहावे, त्यांचा गृहपाठ कमी पडतोय, असा टोला उद्धव ठाकरे यांनी लगावला.

उद्धव ठाकरे म्हणाले, जनतेला देवेंद्र फडणवीसांचा ढोंगीपणा कळत आहे. त्यामुळे त्यांना धन्यवाद देतो त्यांनी त्यांचाच ढोंगीपणाचा बुरखा पाडला. ज्यांच्या मनात राम आहे त्यांना फडणवीसांना सांगायची गरज नाही. मला अयोध्येला जाण्यासाठी निमंत्रणाची गरज नाही. मी सर्वकाही केलं अशा फुशारक्या कोणी मारु नये.