Ulhasnagar News: सेवनिवृत्तीला आठवडा बाकी असतानाच उल्हासनगर पालिका आयुक्त झाले आयएएस

Maharashtra News| सेवनिवृत्तीला अवघा एक आठवडा बाकी असतानाच यूपीएससी परीक्षा उत्तीर्ण झालेले उल्हासनगर महानगरपालिकेचे आयुक्त अजीज शेख हे आयएएस झाले आहेत.त्यामुळे त्यांना थेट दोन वर्षांची मुदतवाढ मिळाली आहे.

नोव्हेंबर 2023 च्या पहिल्या आठवड्यात भारतीय प्रशासन सेवेत नियुक्ती साठी घेण्यात आलेल्या राज्यस्तरीय ऑनलाईन लेखी परिक्षेत उल्हासनगर महानगरपालिका आयुक्त अजीज शेख यांनी बाजी मारली होती.शेख यांनी 281 अधिकाऱ्यांत 13 वा क्रमांक पटकावल्याने ते दिल्ली येथे होणाऱ्या युपीएससी बोर्डच्या परीक्षेसाठी पात्र ठरले होते.

29 नोव्हेंबर 2023 रोजी भारतीय प्रशासन सेवेत निवडीने नियुक्तीकरीता बिगर राज्य नागरी सेवेतील अधिकाऱ्यांची 100 गुणांची ऑनलाईन लेखी परीक्षा आय.बी.पी.एस.मुंबई यांच्यामार्फत घेण्यात आली होती.सदर परीक्षेसाठी 281 अधिकारी उपस्थित होते.या परीक्षेचा निकाल लागल्यावर त्यात 51 गुण मिळवून आयुक्त अजीज शेख यांचा 13 वा क्रमांक लागला होता.

या परिक्षेत प्रथम 20 मध्ये येणारे अधिकारी पुढील आठवड्यात दिल्ली होणाऱ्या युपीएससी बोर्डच्या परीक्षेसाठी पात्र ठरले होते.त्यात अजीज शेख यांचाही समावेश होता

अजीज शेख हे 1994 बॅचचे अधिकारी असून त्यांनी नागपूर,मिरा भाईंदर,कल्याण डोंबिवली,नवी मुंबई या महानगरपालिकेत उपायुक्त पदभार हाताळला आहे.काही वर्षांपूर्वी त्यांची पदोन्नती झाल्यावर त्यांची धुळे महानगपालिकेत आयुक्त पदावर नियुक्ती करण्यात आली होती.अजीज शेख हे 13 जुलै 2022 पासून उल्हासनगर महानगरपालिका आयुक्त पदाचा पदभार हाताळत आहेत.

""31 मे रोजी होता अजीज शेख यांच्या सेवनिवृत्तीचा कार्यक्रम"

अजीज शेख यांना 58 वर्ष पूर्ण झाल्याने 31 मे रोजी त्यांच्या सेवनिवृत्तीचा कार्यक्रम हा शहीद जनरल अरुणकुमार वैद्य सभागृहात आयोजित करण्यात आला होता.आता आयएएस झाल्याने त्यांना मुदतवाढ मिळाली असून अतिरिक्त आयुक्त जमीर लेंगरेकर,उपआयुक्त किशोर गवस,डॉ.सुभाष जाधव,सहायक संचालक नगररचना ललित खोब्रागडे आदी अधिकाऱ्यांनी त्यांचे अभिनंदन केले आहे.