महाराष्ट्रातील पहिलंच शहर जिथं भाजी मार्केट्स बंद, आयुक्तांनी घेतला तडकाफडकी निर्णय

उल्हासनगर : वारंवार आवाहन करूनही लांब अंतर ठेवण्यात आणि गर्दी कमी करण्यात नागरिक पुढाकार घेत नसल्याने काल म्हणजेच दिनांक ३ एप्रिल पासून सायंकाळी 5  वाजेनंतर संपूर्ण भाजी मार्केट्स बंद ठेवण्याचा निर्णय महानगरपालिका आयुक्त सुधाकर देशमुख यांनी तडकाफडकी घेतला आहे. या निर्णयाची काटेकोरपणे अंमलबजावणी करण्यात आल्याने संपूर्ण उल्हासनगर पूर्णपणे थांबलेले चित्र पाहायला मिळालं. संध्याकाळी ५ वाजेनंतर नंतर भाजी मार्केट्स बंद करणारं उल्हासनगर हे महाराष्ट्रातील पहिलेच शहर ठरले आहे.

मोठी बातमी - मुंबई पुण्यात लॉकडाऊन कालावधी वाढणार ? आरोग्यमंत्री राजेश टोपे म्हणतात...

कोरोना व्हायरसच्या पार्श्वभूमीवर देशभरात लॉकडाऊन, संचारबंदी असताना उल्हासनगर मधील नागरिकांना अनेक दिवसांपासून सोशल डिस्टनसिंग ठेवण्याबाबत सूचना देऊनही, भाजी मार्केट मध्ये गर्दी होताना दिसतेय. याशिवाय भाजी विक्रेतेही सुरक्षित अंतर ठेवत नसल्याने अखेर हा निर्णय घेण्यात आला आहे.

शहरात जेवढे प्रमुख भाजी मार्केट्स आहेत त्यासोबत रस्त्याच्या कडेला असणाऱ्या भाजी आणि फळे विक्रेत्यांच्या हातगाड्या ह्या सकाळी 5 ते सायंकाळी 5 वाजेपर्यंतच सुरू ठेवण्याचे निर्देश उल्हासनगरातील प्रभाग समितीचे सहाय्यक आयुक्त गणेश शिंपी, अजय एडके, भगवान कुमावत, तुषार सोनवणे यांना देण्यात आले आहेत. अशी माहिती आयुक्त सुधाकर देशमुख यांनी दिली आहे.

मोठी बातमी -  धक्कादायक! एकाच कुटुंबातील ८ जणांना कोरोनाची लागण

मेडिकलची दुकाने हे बंद मधून वगळण्यात आले असून किराणा मालाच्या दुकानांना रात्री 11 वाजेपर्यंत परवानगी देण्यात आलेली आहे. तिथेही नागरिकांनी नियमांचे उल्लंघन केल्याचे निदर्शनास आल्यास या दुकाच्या बाबतीतही भाजी मार्केटप्रमाणेच निर्णय घेतला जाईल, असा इशारा देखील सुधाकर देशमुख यांनी दिला आहे.

दरम्यान देशमुख यांच्या आदेशाने संध्याकाळी ५ पासून रात्री उशिरापर्यंत भाजी घेण्याच्या बहाण्याने बाहेर फिरणाऱ्या नागरिकांची चांगलीच पंचाईत झाली आहे.

vegetable markets will be closed after 5 pm ulhasnagar municipal commissioner took important decision