ठाणे : ट्रेनसमोर तरुणाने मारली उडी, डोळ्याचे पाते लवते न लवते तोच..

डोंबिवली, ता. 23 - मेल समोर आत्महत्येचा प्रयत्न करणाऱ्या एका 18 वर्षीय युवकाचे रेल्वे पोलिसांच्या प्रसंगावधानामुळे प्राण वाचले आहे. विठ्ठलवाडी रेल्वे स्थानकादरम्यान ही घटना घडली असून युवकाचे प्राण वाचवणारे पोलिस नाईक ऋषीकेश माने यांच्या या धाडसाचे सर्वत्र कौतुक होत आहे.

उल्हासनगर ५ मधील प्रेम नगर टेकडी परिसरात राहणारा कुमार पुजारी हा १८ वर्षीय तरुण बुधवारी दुपारी विठठलवाडी रेल्वे स्थानकाच्या फलाटावर रेंगाळत होता. दुपारी 2.30 च्या सुमारास मुंबईकडे जाणारी एक्स्प्रेस विठ्ठलवाडी स्थानकात येत होती. याच दरम्यान काही कळायच्या आत कुमारने रेल्वे ट्रॅकवर उडी मारत आत्महत्या करण्याचा प्रयत्न केला. यावेळी कर्तव्यावर असलेले पोलिस नाईक माने यांनी युवकाच्या मागोमाग ट्रॅकवर उडी मारत त्याला बाहेर ढकलले व स्वतः देखील ट्रॅकच्या बाहेर उडी मारली इतक्यात बाजूने वेगाने मेल एक्सप्रेस पास झाली.

डोळ्याचे पाते लवते न लवते तोच घडलेल्या घटनेने प्रवाशांसह सर्वाचा श्वास रोखला गेला होता. मात्र मेल निघून गेल्यानंतर या युवकासह माने यांना सहीसलामत पाहून सर्वांचा जीव भांड्यात पडला. पोलिसांनी या युवकाला कल्याण रेल्वे पोलीस ठाण्यात आणून त्याच्या पालकांना पोलीस ठाण्यात बोलावले असून या तरुणाचे पोलिसांनी समुपदेशन केले. तर तरुणाचे प्राण वाचविणाऱ्या माने यांच्यावर कौतुकाचा वर्षाव होत आहे