Weather News: 'ऑक्टोबर हिट’ची झळ वाढली ;जमिनीला पडू लागल्या भेगा!

Weather News: ‘ऑक्टोबर हिट’ची झळ पालघर जिल्ह्याला बसू लागली असून उष्णतेमुळे जमिनीला भेगा पडू लागल्या आहेत. जिल्ह्यातील तापमानाचा पारा ३६ अंश सेल्सिअसपर्यंत वाढला आहे. बुधवारी (ता. २५) ३४ अंश सेल्सिअस तापमानाची नोंद झाली होती. वाढत्या उष्म्यामुळे नागरिकांच्या अंगाची लाहीलाही होत आहे. पुढील आठवड्यात हे तापमान कायम राहण्याची शक्यता असल्याने नागरिकांना आरोग्याची काळजी घ्यावी लागणार आहे.

मुंबई-अहमदाबाद महामार्गावरील दुचाकी, रिक्षा वाहनांना गरम वाऱ्याची झळ सोसावी लागत आहे. शरीरातील पाणी कमी होऊ नये, म्हणून पाण्याचा वापर वाढला आहे. उष्णतेपासून बचाव करण्यासाठी नागरिक रुमाल, हातमोजे वापरत आहेत. डॉक्टरांनी काळजी घेण्याचे आवाहन केले आहे.

आठवड्यातील तापमान (अंश सेल्सिअस)
रविवार ३६
सोमवार ३६
मंगळवार ३६
बुधवार ३४
गुरुवार ३४