पिशवी आणायला गेली अन्‌ स्वप्नांची राखरांगोळी झाली...

मुंबई : वडील अंथरुणाला खिळल्यावर 25 वर्षीय आरती जैस्वालने भावासोबत कुटुंबाची जबाबदारी स्वीकारली. आयुष्यभर भाड्याच्या घरात राहाणाऱ्या आपल्या कुटुंबासाठी मुंबईत स्वतःचे घर घेण्याचे आरतीचे स्वप्न होते. मात्र, शुक्रवारी साकीनाका येथे लागलेल्या आगीत आरती जैस्वालचा होरपळून मृत्यू झाला. आग लागल्याचे कळताच आरती सहकाऱ्यांबरोबर कार्यालयाबाहेर पडली; मात्र कार्यालयात राहिलेली पिशवी आणण्यासाठी परत गेली ती बाहेर आलीच नाही.

महत्वाची बातमी  'वर्षा'वरील रेघोट्यांवर संजय राऊत याचं उत्तर, म्हणालेत...

लालजी जैस्वाल यांचे रेशनचे दुकान होते. काही वर्षांपूर्वी आजारी पडल्याने त्यांना दुकान बंद करावे लागले. त्यामुळे कुटुंबाची जबाबदारी आरती आणि तिचा भाऊ प्रदीप याने स्वीकारली. वडिलांच्या औषधोपचाराचा खर्च भागवण्यासाठी आरतीने शिक्षण सोडून नोकरीची वाट धरली. साकीनाका येथील मनन क्रिएशन या कंपनीत आरती तीन वर्षांपासून काम करत होती.

हे देखील वाचा महिला जास्त खोटं बोलतात की पुरुष, आता मिळालं उत्तर..

गुरुवारी सायंकाळी नजीकच्या थिनर कंपनीला आग लागल्याचे कळताच आरती कार्यालयातील सहकाऱ्यांसोबत बाहेर पडली. मात्र, विसरलेली पिशवी परत आणण्यासाठी आरती कार्यालयात परत गेली. तेवढ्यात आगीने रौद्ररूप धारण करत तिच्या कार्यालयापर्यंत आली. अशाही अवस्थेत ती बाहेर पडण्याचा प्रयत्न करत होती; मात्र तेवढ्यात वाटेत लोखंडी खांब पडल्याने तिला बाहेर पडणे अशक्‍य झाल्याचे प्रत्यक्षदर्शींनी सांगितले. त्यामुळे मुंबईत स्वत:चे घर घेण्याचे आरतीचे स्वप्न आगीच्या ज्वाळांसह खाक झाले. 

आरती आणि तिचा भाऊ प्रदीपवर कुटुंबाची जबाबदारी होती. वडिलांच्या औषधोपचाराचा खर्च आरती करत होती. आता आरतीच्या जाण्याने कुटुंबाचा आधारच निघून गेला आहे. दरवेळी आग कशी काय लागते? प्रशासन दुर्घटनेची सखोल चौकशी का करत नाही ? वारंवार होणाऱ्या दुर्घटनांमुळे आतातरी शासनाने रासायनिक कंपन्या तिथून हटवाव्यात. आरतीच्या कुटुंबाला शासनाने मदत करावी. 
- रवी कुमार, मृत आरतीचे मामा