Forest Beding: ‘फॉरेस्ट बेदिंग’ने करा मानसिक तणाव दूर; झाडांच्या सान्निध्यात मनाला मिळते शांती

Forest Beding - ‘फॉरेस्ट बेदिंग’ मध्ये जंगलातील वृक्ष आणि तिथल्या नैसर्गिक वातावरणात अधिकाधिक काळ घालवायचा असतो. यामुळे आरोग्यवर सकारात्मक परिणाम दिसून येतात.

निसर्गाच्या सानिध्यात दोन - तीन तास घालवल्याने मनाला शांतता मिळून अल्हाददायक वाटते. ‘फॉरेस्ट बेदिंग’ हा मानसिक तणाव आणि समस्या दूर करण्याचा सोपा उपाय आहे.

‘फॉरेस्ट बेदिंग’ची सुरुवात जपानमध्ये १९८० मध्ये झाल्याचे सांगितले जाते. यासाठी जंगलातच जावे लागेल, असे नाही. घराजवळ असलेल्या बागेत किंवा जिथे कुठे उंच - उंच झाडे आहेत, हिरवळ आहे तिथे एक - दोन तास घालवा. स्वतःमध्ये तुम्हाला नक्कीच बदल जाणवतील.

आजाराला दूर सारण्यात मदत

जे लोक ‘फॉरेस्ट बेदिंग’ साठी बाहेर पडतात ते कित्येक प्रकारच्या जीवघेण्या अशा कॅन्सरसारख्या रोगांपासून स्वतःला वाचवू शकतात. जितका तुम्ही झाडांच्या आजूबाजूला किंवा नैसर्गिक वातावरणात वेळ घालवाल, तितकी रोगप्रतिकारक शक्ती मजबूत होते. निसर्गाच्या सानिध्यात राहिल्याने शरीराबरोबरच मेंदूलाही फायदा मिळतो.

तणावापासून मुक्तता

अमेरिकेतील एका संशोधनानुसार, नेचर वॉक आपल्या डोक्यातले विचार कमी करतो. एका युरोपीयन स्टडीनुसार, झाडांच्या सानिध्यात राहिल्याने पुरुषांच्या मृत्यूदरात १६ टक्क्यांनी घट होऊ शकते.

शिवाय निसर्गाच्या सानिध्यात राहिल्याने तणावापासून मुक्तीही मिळते. लक्ष केंद्रित होते. तसेच सर्जनशीलता वाढविते. पहिल्यापेक्षा अधिक आनंदी असल्याचे जाणवते.

असा करा उपाय

जिथे कुठे खूप हिरवीगार झाडे आहेत तिथे जाऊ शकता

कमीत कमी दोन तास तिथे फेरफटका मारा

घाईगडबडीत नाही तर निवांतपणे फिरत आजूबाजूचे वातावरण अनुभवा

उंच-उंच झाडे, आजूबाजूचा निसर्ग पाण्याचा आनंद लुटा

दीर्घ श्वास घ्या. फिरताना मध्येमध्ये बसत चला

झाडांना - पानांना आपल्या हातांनी स्पर्श करा

यामुळे तुमचे निसर्गावर प्रेम जडले असे वाटेल.