लॉकडाऊनमुळे थकले तुरीचे चुकारे

नांदेड : शासनाच्या किमान हमी दर (एमएसपी) योजनेअंतर्गत जिल्ह्यात सुरु असलेल्या पंधरा तुर खरेदी केंद्रावर आजपर्यंत सहा हजार ८५७ शेतकऱ्यांची ४० हजार ८७५ क्विंटल तूर खरेदी करण्यात आली. या तुरीच्या २३ कोटी ७० लाख ७५ हजार रुपयांपैकी आजपर्यंत पाच कोटी ६० लाख ६४ हजार रुपये शेतकऱ्यांच्या खात्यावर वर्ग करण्यात आले आहेत. यामुळे शेतकऱ्यांना चुकारे मिळण्यास विलंब होत असल्याचे स्पष्ट होत आहे.

२५ फेब्रुवारीपासुन खरेदी सुरु
बाजारात तुरीचे दर कमी झाल्यामुळे शेतकऱ्यांचे नुकसान मोठ्या प्रमाणात होते. यामुळे शासनाने किमान हमी दरानुसार तुर खरेदी करण्याचा निर्णय घेतला. शेतकऱ्यांना तूर खरेदी करण्यासाठी ऑनलाइन नोंदणी करण्याचे आवाहन करण्यात आले होते. यानुसार जिल्ह्यात ता. २५ फेब्रुवारीपासून तूर खरेदी सुरू झाली. 

हेही वाचा....नांदेड बाजारात भुईमुगाची आवक सुरू

पंधरा खरेदी केंद्रावर खरेदी सुरु
जिल्ह्यात महाराष्ट्र राज्य सहकारी मार्केटिंग फेडरेशन अंतर्गत सहा ठिकाणी खरेदी सुरु आहे. यात नांदेड, मुखेड, हदगाव, किनवट, बिलोली व देगलूर येथील खरेदी केंद्राचा समावेश आहे. तर विदर्भ को-ऑपरेटिव्ह मार्केटिंग फेडरेशनकडून नायगाव, भोकर व धर्माबाद याठिकाणी तुरीचे खरेदी केंद्र सुरू झाले. तसेच महाराष्ट्र फार्मर्स प्रोड्युसर कंपनीकडून (महा एफपीसी) सहा ठिकाणी खरेदी केंद्र सुरू आहेत. त्यात धानोरा (ता. धर्माबाद), करडखेड (ता. देगलूर), बरबडा (ता. नायगाव), डोणगाव (ता. बिलोली), नारनाळी (ता. कंधार) तसेच मांडवा (ता. किनवट) येथील खरेदी केंद्राचा समावेश आहे. 

हेही वाचलेच पाहिजे.... काजव्यांच्या प्रकाशात पाहिलं सुगरणीचं घरटं...!

६,८५७ शेतकऱ्यांची ४०, ८७५ क्विंटल खरेदी 
तुर खरेदी करण्यासाठी १६ हजार ५३५ शेतकऱ्यांनी ऑनलाईन नोंदणी केली. त्यापैकी आठ हजार २५८ शेतकऱ्यांनी ४० हजार ८७५ क्विंटल माल विक्रीसाठी आणला. यातील सहा हजार ८५७ शेतकऱ्यांची ४० हजार ८७५ क्विंटल तूर खरेदी झाली. 

चोवीस कोटी पैकी पाच कोटी खात्यावर जमा
तुर खरेदी झालेल्या सहा हजार ८५७ शेतकऱ्यांपैकी आजपर्यंत दोन हजार १२५ शेतकऱ्यांच्या चार हजार ७५५ क्‍विंटल तुरीचे पाच कोटी ६० लाख ६४ हजार १९२ रुपये त्यांच्या खात्यावर वर्ग केले आहे. चाळीस हजार ८७५ क्विंटल तुरीची २३ कोटी ७० लाख ७५ हजार रुपये होतात. यापैकी अद्याप ३६ हजार १२० शेतकऱ्यांचे २० कोटी ९४ लाख ९६ हजार रुपयांची रक्कम थकली आहे. यावरुन शेतकऱ्यांचे पैसे थकल्याचे स्पष्ट होत आहे. तुर खरेदी ता. ३० मे पर्यंत होणार असल्याची माहिती जिल्हा मार्केटिंग अधिकारी एस. एस. पाटील यांनी दिली.